“Azexport” portalı vasitəsi ilə Küveytə “Naftalan yağları” ixrac olunacaq
Bakı, 23 avqust, AZƏRTAC
İqtisadi İslahatların Təhlili və Kommunikasiya Mərkəzinin operatoru olduğu “Azexport” portalı Azərbaycanda istehsal olunan “Naftalan yağları” məhsuluna sərbəst satış sertifikatı təqdim edib.
Mərkəzdən AZƏRTAC-a bildirilib ki, əsasən kosmetik vasitə kimi istifadə olunan “Naftalan yağları” Küveytə ixrac olunacaq. “Naftalan yağı” məhsulunun ilkin mərhələdə üç növdə ixracı nəzərdə tutulub.
Qeyd edək ki, sərbəst satış sertifikatı Azərbaycan Respublikası Prezidentinin 2017-ci il 12 sentyabr tarixli müvafiq Fərmanına uyğun olaraq “Azexport” portalı tərəfindən təqdim olunur.
Sertifikat ixrac olunan malın Azərbaycan Respublikasında sərbəst dövriyyədə olduğunu, aidiyyəti dövlət orqanları və qurumları tərəfindən sertifikatlaşdırıldığını və standartlara cavab verdiyini təsdiq edir. Sərbəst satış sertifikatının verilməsi əvvəllər 100-dən artıq Amerika qitəsi, Asiya, Okeaniya və Körfəz ölkələrinə yerli məhsul ixracını asanlaşdırıb.
Sərbəst satış sertifikatı əldə etmək istəyən sahibkarlar “www.Azexport.az” portalı vasitəsilə müraciət edə bilərlər.
Bölmənin digər xəbərləri
