AZKİL İMİŞLİDƏ İCMA LAYİHƏLƏRİ HƏYATA KEÇİRİR
AZƏRTAC-ın müxbiri xəbər verir ki, cari ilin on ayında İmişlidə Azərbaycan Kənd İnvestisiya Layihəsinin (AzKİL) maliyyə dəstəyi ilə 387.539 ABŞ dolları dəyərində sosialyönümlü bir sıra icma layihələri həyata keçirilmişdir. Rayonun Muradallı və Yuxarı Qaralar kəndlərində 29 kilometr uzunluqda şor kollektorları lildən təmizlənmiş, Bəcirəvan kəndində su nasosları quraşdırılmış, Mirili, Kürdmahmudlu və Otuzikilər kəndlərində 35 kilometr uzunluqda yol abadlaşdırılmış, Qulubəyli kəndində isə tibb məntəqəsi tikilib istifadəyə verilmişdir.
AzKİL-in maliyyəsi ilə hazırda rayonun Xubyarlı kəndində tibb məntəqəsi, Muradxanlı kənd məktəbi üçün əlavə sinif otaqları inşa olunur. Qızılkənd, Mürsəlli, Cəfərli və Qaraqaşlı kənd yolları təmir edilir. Qurumun yardımı hesabına rayonun Qaralar, Göbəktala, Qaradonlu, Rəsullu, Məhəmmədli, Aranlı, Əliqulular, Murğuzallı, Qaragüvəndikli və Məmmədli kəndlərinin yollarında bərpa işlərinin görülməsi də nəzərdə tutulmuşdur.
Bölmənin digər xəbərləri
