Azərbaycanın tarixinə qızıl hərflərlə yazılan gün - ŞƏRH
Bakı, 13 iyun, AZƏRTAC
Azərbaycan XX əsrin sonlarında ikinci dəfə müstəqillik qazansa da, bu müstəqilliyimizi istər daxildə, istərsə də xaricdə istəməyən güclü qüvvələr var idi. Ermənistanın Azərbaycana qarşı hərbi təcavüzü və torpaqlarımızı işğal etməsi, eləcə də daxildəki siyasi qüvvələrin hakimiyyət uğrunda çəkişmələri dövlətimizi tamamilə zəiflətmiş, məhv olmaq təhlükəsi ilə üz-üzə qoymuşdu.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, hakimiyyətdə olan AXC-Müsavat cütlüyünün xarici siyasətində də böyük uğursuzluqlar hökm sürürdü. Qonşu ölkələrlə münasibətlər korlanmış, Azərbaycan dünyadan təcrid olunmuş vəziyyətə düşmüşdü. Dünya dövlətləri ilə iqtisadi-siyasi əlaqələr tamamilə dağılmışdı.
Azərbaycan dövlətinin əsl müstəqilliyinin, suverenliyinin və bir dövlət kimi inkişafının Milli Qurtuluş Günündən başladığını bildirən K.Əliyeva qeyd edib: “Azərbaycan xalqının erməni təcavüzünə son qoyacaq, əhalinin sosial vəziyyətini yaxşılaşdıracaq, ölkəni vətəndaş müharibəsindən xilas edəcək bir liderə ehtiyacı var idi. Xalq inanırdı ki, ölkəni bu ağır günlərdən xilas edəcək və dövlətin suverenliyini bərpa edə biləcək yeganə şəxsiyyət Heydər Əliyevdir. Məhz o günlərdə xalqımız güclü dövlət qurmaq üçün dahi şəxsiyyət olan Heydər Əliyevin ətrafında sıx birləşməyin vacibliyi barədə müdrik qərar verdi.
1993-cü il iyunun 9-da Azərbaycan xalqının çağırışına cavab verən Ulu Öndər Heydər Əliyev Bakıya qayıtdı. Onun qayıdışı ölkəmizin və xalqımızın taleyində dönüş nöqtəsi oldu, böyük inkişafa və gözəl gələcəyə doğru addım atıldı. 1993-cü il iyunun 15-də Ulu Öndər Heydər Əliyevin hakimiyyətə qayıdışı ilə müstəqil Azərbaycan dövləti böhrandan xilas oldu. Həmin gün Heydər Əliyev Azərbaycan Ali Sovetinin sədri seçildi. İyunun 24-də isə Milli Şuranın qərarı ilə Azərbaycan Prezidentinin səlahiyyətləri Ali Sovetin sədri Heydər Əliyevə verildi.
Beləliklə, 15 İyun - Milli Qurtuluş Günü Azərbaycanın tarixinə qızıl hərflərlə yazılmış bir gün oldu. 1997-ci ilin iyun ayında Milli Məclis iyunun 15-ni "Milli Qurtuluş Günü" elan etdi. Heydər Əliyevin adı Azərbaycan tarixinə Vətəninin və xalqının xilaskarı kimi yazıldı. Məhz Ulu Öndər Heydər Əliyev Azərbaycanda vətəndaş həmrəyliyinə, eləcə də dövlətimizdə sabitliyin və əmin-amanlığın bərqərar olmasına nail oldu”.
Professor vurğulayıb ki, Ulu Öndər Heydər Əliyevin arzusu Azərbaycan dövlətini bütöv görmək idi. Ümummilli Lider Heydər Əliyev məcburi köçkünlərlə görüşlərində işğal altında qalan torpaqlarımıza mütləq dönəcəyimizi qətiyyətlə vurğulayırdı. Ulu Öndərin həyata keçirdiyi siyasi-iqtisadi siyasətin əsas məqsədlərindən biri işğal altında olan torpaqlarımızın azad edilməsi idi. Ulu Öndər Heydər Əliyev hər zaman “Biz bu torpaqlarsız yaşaya bilmərik” deyirdi. Azərbaycan xalqının Heydər Əliyevə olan tükənməz inamı, Heydər Əliyev şəxsiyyətinin qüdrəti və əzəməti, Ulu Öndərin öz xalqına sevgisi və məhəbbəti nəticəsində bugünkü güclü Azərbaycan dövləti formalaşıb.
“Ulu Öndər Azərbaycanı parçalanmaqdan xilas etdi, ölkədə qayda-qanun bərpa olundu, güclü ordu quruculuğunun təməli qoyuldu. Ölkəmizdə qanunsuz silahlı birləşmələrin dövlət çevrilişi cəhdlərinə son qoyuldu. Ölkədə ilk parlament seçkiləri keçirildi, Konstitusiya qəbul edildi. Azərbaycanın dünyaya inteqrasiyasına, eləcə də ölkədə iqtisadi və siyasi islahatlara başlanıldı və çoxpartiyalı sistem yaradıldı. Ulu Öndər Heydər Əliyevin sayəsində Qarabağ müharibəsində atəşkəsə nail olundu. Atəşkəs əldə edildikdən sonra Azərbaycanın iqtisadi inkişafının əsası qoyuldu və gələcəkdə böyük Qələbəmizin qazanılması üçün şərait yaradıldı.
Neft müqavilələrinin imzalanması ilə Azərbaycan dövləti sürətli və dayanıqlı iqtisadi inkişaf yoluna qədəm qoydu. Məhz Ulu Öndər Heydər Əliyevin ordu quruculuğu istiqamətində gördüyü işlərin nəticəsidir ki, Azərbaycan Ordusu dünyanın ən güclü orduları sırasında yer alır. Vətən müharibəsində Azərbaycan Ordusunun göstərdiyi şücaət, xüsusilə Şuşanın işğaldan azad edilməsi uğrunda həyata keçirilən hərbi əməliyyatlar bir çox dünya ölkələrinin ordularında öyrənilir”, - deyə K.Əliyeva bildirib.
O əminliklə bildirib ki, Ulu Öndər Heydər Əliyev müasir müstəqil Azərbaycanın banisi və memarıdır. Ümummilli Lider Heydər Əliyev bütün həyatını canından çox sevdiyi Vətəninə və xalqına həsr edib. Bu gün Prezident İlham Əliyev dövlətimizin inkişafı və tərəqqisi naminə Heydər Əliyev siyasi kursunu layiqincə davam etdirir. Bu siyasətin nəticəsidir ki, Azərbaycan dünyada öz gücünü və nüfuzunu durmadan artırmaqdadır. Azərbaycan Prezidenti, Müzəffər Ali Baş Komandan İlham Əliyev bütün dünyaya Azərbaycanı qalib dövlət, Azərbaycan xalqını isə qəhrəman xalq kimi tanıtdı.
Bölmənin digər xəbərləri
