AzTU-nun gənc tədqiqatçıları Türkiyənin tanınmış universitetlərində təcrübə keçəcəklər
Bakı, 25 oktyabr, AZƏRTAC
Azərbaycan Texniki Universiteti (AzTU) gənc tədqiqatçı və müəllimlərini təcrübə əldə etmələri və tədqiqat aparmaları məqsədilə Türkiyənin tanınmış universitetlərinə göndərəcək.
AzTU-dan AZƏRTAC-a bildirilib ki, proqramın müddəti 5 ay təşkil edəcək. Proqramda iştirak etmək imkanı əldə edən namizədlərin yol xərcləri Azərbaycan Texniki Universiteti tərəfindən ödəniləcək, yemək və qalmaq ehtiyacları isə Türkiyə tərəfindən qarşılanacaq. Proqram AzTU-nun bütün ixtisas istiqamətləri üzrə 100 nəfəri əhatə edəcək.
Müsabiqəyə Texniki Universitetin 30 yaşa qədər olan II kurs magistrantları, 35 yaşa qədər olan doktorantları müraciət edə bilər. Namizədlərin seçimi iki mərhələdə aparılacaq. İlkin mərhələdən keçən namizədlər müsabiqəyə dəvət olunacaq. Müraciət elektron ərizə sistemi vasitəsilə həyata keçirilir. Müraciətlər noyabrın 10-dək qəbul olunur.
Bölmənin digər xəbərləri
