Beynəlxalq Atom Enerjisi Agentliyinin (BAEA) baş direktoru Məhəmməd əl Bəradei ABŞ-ı İraqda kütləvi qırğın silahlarının (KQS) axtarışının nəticələri haqqında məruzənin tam versiyasını bu təşkilata təqdim etməyə və BAEA müfəttişlərinin öz missiyasını başa çatdırmaq üçün bu ölkəyə qayıtmasına imkan verməyə çağırmışdır.

O, “Vaşinqton post” qəzetinə müsahibəsində demişdir: “Əgər İraqda silah varsa, biz onu tapmaq istərdik, əgər yoxdursa, bu məsələ xətm olunmuşdur. ABŞ məruzənin məxfi versiyasını bizə təqdim etməlidir”.

Əl-Bəradei vurğulamışdır ki, BMT-nin hər bir üzvü kimi, ABŞ da Təhlükəsizlik Şurasının qətnamələrinə uyğun olaraq, İraqın sabiq rəhbərliyinin nüvə silahı yaradılmasına dair mümkün planlarına aid istənilən informasiyanı BAEA-ya təqdim etməlidir. O, məruzənin tam versiyasını almaq məqsədi ilə hələ ötən ay ABŞ hökumətinə müraciət etmiş, lakin indiyədək cavab almamışdır.

Söhbət ABŞ-ın İraqda KQS-nin axtarışı ilə məşğul olan ekspertlər qrupunun rəhbəri Devid Keyin məruzəsindən gedir. Məruzədə ABŞ-ın İraqa müdaxiləsi zamanı bu ölkənin KQS-ya malik olması barədə əsaslı dəlillərin yoxluğu göstərilirdi.