Bakı Beynəlxalq Astronavtika Konqresi ən zəngin mübadilə və əməkdaşlıq məkanı olacaq
Paris, 22 sentyabr, AZƏRTAC
Qlobal kosmos ictimaiyyəti bütün iştirakçıları 2023-cü il oktyabrın 2-dən 6-dək Qafqazın mirvarisi, müxtəlif mədəniyyətlərin, landşaftların və innovasiyaların məkanı olan Bakıda keçiriləcək 74-cü Beynəlxalq Astronavtika Konqresində gözləyir.
Bu fikirlər Parisin ev sahibliyi etdiyi 73-cü Beynəlxalq Astronavtika Konqresindən AZƏRTAC-a verilən açıqlamada yer alıb.
Konqresdən bildirilib ki, 73-cü Konqresdə 110 ölkədən 9300-dən çox nümayəndə iştirak edib, onların 45 faizi gənclər olub. Konqres “məsuliyyətli tədbir” standartlarına uğurla cavab verib və Beynəlxalq Standartlaşdırma Təşkilatının (ISO) sertifikatını alıb. Həftə ərzində 3000-dən çox məruzə təqdim olunub. Onların arasında 800 innovativ interaktiv təqdimat keçirilib. Konqres çərçivəsində təşkil olunan 10 plenar iclas və mühazirələr ilin ən maraqlı mövzularını əhatə edib. Beynəlxalq Astronavtika Assambleyasına (İAF) 45 yeni üzv seçilib və bununla da İAF-ın üzvlərinin ümumi sayı 468-ə çatıb. Parisdəki Konqres çərçivəsində İAF-a 4 yeni vitse-prezident seçilib.
Səkkiz min kvadratmetrdən çox sahəni əhatə edən sərgidə 250 stend arasında Azərbaycan guşəsi diqqəti xüsusilə cəlb edib. Artıq beynəlxalq astronavtika ailəsi Bakıda keçiriləcək növbəti Konqresə hazırlığa başlayıb.
Bakının 2023-cü il oktyabrın 2-dən 6-dək ev sahibliyi edəcəyi 74-cü Beynəlxalq Astronavtika Konqresinin ən səmərəli mübadilə və əməkdaşlıq məkanı olacağına əminlik vurğulanıb.
AZƏRTAC-ın xüsusi müxbiri
Paris
Bölmənin digər xəbərləri
