Bakı Biznes Universitetinin nümayəndələri Rumıniyada səfərdə olublar
Buxarest, 13 dekabr, AZƏRTAC
Bakı Biznes Universiteti (BBU) ilə Rumıniyanın Babes Bolyayi Universiteti arasında imzalanmış müqaviləyə əsasən, “Erasmus+” proqramı çərçivəsində BBU-nun nümayəndə heyəti Babes Bolyayi Universitetində olub.
İki universitet arasında əlaqələrin daha da genişləndirilməsi məqsədilə təşkil olunan səfər zamanı BBU-nun layihələrin idarəedilməsi şöbəsinin müdiri Gülşən Bayramova Babes Bolyayi Universitetinin biznesin idarəedilməsi fakültəsində bakalavr və magistrlər üçün mühazirə oxuyub.
BBU-nun beynəlxalq əlaqələr üzrə prorektoru Eşqin Bayramov, beynəlxalq əlaqələr şöbəsinin müdiri Zamiq Əhmədov, universitetin “Erasmus+” ofisinin direktoru, müdiri və digər əməkdaşların iştirakı ilə keçirilən görüşlərdə “Erasmus+” proqramı çərçivəsində əlaqələrin daha da genişləndirilməsinə və ortaq layihələrin hazırlanmasına qərar verilib. Bundan əlavə biznesin idarəedilməsi və avropaşünaslıq fakültəsinin dekanı və əməkdaşları ilə görüşlər keçirilib, iki universitet arasında elmi əməkdaşlığın inkişaf etdirilməsi, birgə beynəlxalq konfransların təşkili, tələbə-müəllim mübadiləsinin həyata keçirilməsi razılaşdırılıb. Səfər zamanı növbəti ildə BBU-nun “Audit” jurnalının bir nömrəsində Babes Bolyayi Universiteti müəllimlərinin məqalələrinin dərc edilməsi üçün razılıq əldə olunub.
Qeyd edək ki, artıq BBU-nun müəllimlərinin məqalələri Babes Bolyayi Universitetinin avropaşünaslıq fakültəsinin nəşri olan “Studia Europaea” jurnalında çap edilib.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
