BAKI DÖVLƏT UNİVERSİTETİ HÜQUQ FAKÜLTƏSİNİN 80 İLLİK YUBİLEYİ QEYD OLUNMUŞDUR
Aprelin 9-da Bakı Dövlət Universitetində (BDU) bu ali məktəbin hüquq fakültəsinin 80 illik yubileyinə həsr olunmuş təntənəli tədbir keçirilmişdir. AZƏRTAC xəbər verir ki, tədbir iştirakçıları əvvəlcə Fəxri xiyabana gələrək, ümummilli liderimiz Heydər Əliyevin məzarı önünə əklil qoymuş və xatirəsini ehtiramla yad etmişlər.
Görkəmli oftalmoloq alim, akademik Zərifə xanım Əliyevanın məzarı önünə də gül dəstələri düzülmüşdür.
Yubiley tədbirinin iştirakçıları Şəhidlər xiyabanında da olmuş, ölkəmizin müstəqilliyi və ərazi bütövlüyü uğrunda canlarından keçmiş Vətən övladlarının məzarları üzərinə gül qoymuşlar.
BDU-nun hüquq fakültəsində müasir avadanlıqla təchiz edilmiş kriminalistika laboratoriyasının açılışı olmuşdur. Mərasim iştirakçıları laboratoriya ilə tanış olmuşlar.
Sonra ayrı-ayrı dövlət qurumları nümayəndələrinin, tanınmış alim və pedaqoqların, tələbələrin iştirak etdikləri tədbirdə Bakı Dövlət Universitetinin rektoru, Milli Məclisin deputatı, akademik Abel Məhərrəmov, hüquq fakültəsinin dekan əvəzi, professor Firudin Səməndərov xalqımızın ümummilli lideri, müstəqil dövlətimizin memarı və qurucusu Heydər Əliyevin elm və təhsilimizin inkişafına daim böyük önəm verdiyini, dahi rəhbərimizin məqsədyönlü siyasətinin Prezident İlham Əliyev tərəfindən əzmlə davam etdirildiyini vurğulamışlar.
Bu il respublikamızda növbəti prezident seçkilərinin keçiriləcəyini qeyd edən natiqlər, qarşıdan gələn seçkilərdə də xalqımızın İlham Əliyevi yekdilliklə dəstəkləyəcəyinə əmin olduqlarını bildirmişlər.
1919-cu ildə yaradılan Bakı Dövlət Universitetinin inkişaf mərhələlərindən danışan natiqlər bildirmişlər ki, hazırda bu ali məktəbin 16 fakültəsində 18 mindən artıq tələbə təhsil alır. Ulu öndərimiz Heydər Əliyevin BDU-nun məzunu olduğu qürur hissi ilə diqqətə çatdırılmışdır.
Sonra 80 illik yubileyi qeyd edilən hüquq fakültəsinin inkişaf yolu barədə ətraflı məlumat verilmişdir.
Hüquq fakültəsi 1927-ci ildə Azərbaycan Dövlət Universitetinin (indiki BDU) şərq fakültəsinin şöbəsi kimi yaradılmış, 1928-ci ildə bu şöbə müstəqil hüquq fakültəsinə çevrilmişdir.
Hüquq fakültəsi tarixinin parlaq dövrü ümummilli liderimiz Heydər Əliyevin adı ilə bağlı olmuşdur. Bu fakültə ali hüquq təhsilli mütəxəssislər hazırlamaqla yanaşı, Asiya, Afrika və Latın Amerikasının 50-dən artıq ölkəsi üçün yüksək ixtisaslı diplomat kadrlar hazırlayan mərkəz olmuşdur.
1970-1980-ci illərdə respublikada hüquq elminin inkişafında və yüksək ixtisaslı hüquqşünas kadrların hazırlanmasında, hüquqi biliklərin təbliğində bu fakültə alimlərinin xüsusi rolu olmuşdur.
Hazırda 7 kafedrası olan hüquq fakültəsi Türkiyə, Rusiya, ABŞ, Almaniya, Ukrayna və digər ölkələrin aparıcı universitetləri və elmi mərkəzləri ilə əməkdaşlıq əlaqələri qurmuşdur.
Hüquq fakültəsinin inkişafında və yüksək səviyyəli hüquqşünas kadrların hazırlanmasında görkəmli alimlərimizin - Vahid Qəhrəmanovun, Cahangir Kərimovun, Məmməd Xələfovun, Murtuz Ələsgərovun və başqalarının müstəsna xidmətləri qeyd edilmişdir.
Parlament sədrinin birinci müavini Ziyafət Əsgərov Milli Məclisin sədri Oqtay Əsədovun hüquq fakültəsinin 80 illik yubileyi münasibətilə təbrik məktubunun mətnini oxumuşdur.
Yubileyə Ankara Universiteti, Moskva Dövlət Universiteti, Kiyev Dövlət Universiteti və digər ölkələrin ali məktəbləri, respublikamızın ayrı-ayrı nazirlikləri, ali təhsil müəssisələri də təbrik məktubları göndərmişlər.
Konstitusiya Məhkəməsinin sədri Fərhad Abdullayev respublikamızda hüquqi dövlət quruculuğu sahəsində həyata keçirilən tədbirlərin əhəmiyyətini vurğulamışdır. Yüksək ixtisaslı hüquqşünas mütəxəssislərin hazırlanmasında BDU-nun hüquq fakültəsinin mühüm rolunu qeyd edən natiq müəllim və tələbələrə yeni nailiyyətlər arzulamışdır.
Fakültənin elmi və pedaqoji fəaliyyəti ilə fərqlənən professor-müəllimləri Təhsil Nazirliyinin “Qabaqcıl təhsil işçisi” döş nişanına, fəxri fərmanlarına və BDU-nun mükafatlarına layiq görülmüşlər.
Yubiley tədbirində çıxış edən Prezidentin İcra Aparatı hüquq-mühafizə orqanları ilə iş şöbəsinin müdiri Fuad Ələsgərov, Ali Məhkəmənin sədri Ramiz Rzayev, Azərbaycan Respublikasının insan hüquqları üzrə müvəkkili (Ombudsman) Elmira Süleymanova, ədliyyə nazirinin müavini Vilayət Zahirov, təhsil nazirinin müavini İradə Hüseynova və digər natiqlər də BDU-nun hüquq fakültəsinin fəaliyyətini yüksək dəyərləndirmiş, əlamətdar gün münasibətilə xoş arzularını bildirmişlər.
Sonra hüquq fakültəsinin yubileyinə həsr edilmiş “Qloballaşan cəmiyyətdə hüquq elminin aktual problemləri” mövzusunda elmi konfrans keçirilmişdir.
 |
 |
 |
Bölmənin digər xəbərləri
