Bakı Şəhər Mədəniyyət Baş İdarəsi Qələbə gününə həsr olunmuş müsabiqənin gedişatını müzakirə edib
Bakı, 6 may, AZƏRTAC
Bakı Şəhər Mədəniyyət Baş İdarəsi 9 May - Qələbə gününə həsr olunmuş “Qələbəyə doğru!” I onlayn festival-müsabiqənin təşkilat komitəsinin üzvləri ilə videokonfrans keçirib.
Baş İdarədən AZƏRTAC-a bildirilib ki, videokonfransda münsiflər heyətinin üzvlərinə Bakı şəhərində fəaliyyət göstərən musiqi və incəsənət məktəblərindən festivalın şərtlərinə uyğun olaraq 237 ədəd videoçarx daxil olduğu bildirilib. Həmin videoçarxlar Baş İdarənin baku-art.az rəsmi internet səhifəsində yerləşdirilib. Həmçinin I onlayn festival-müsabiqənin reqlamenti ilə bağlı texniki məsələlər müzakirələr olunub.
Xatırladaq ki, ötən ay Bakı Şəhər Mədəniyyət Baş İdarəsi faşizm üzərində qələbənin 75 illiyi münasibətilə 9 May - Qələbə gününə həsr olunmuş “Qələbəyə doğru!” I onlayn festival-müsabiqənin keçirilməsini elan edib. Müsabiqədə məqsəd sosial izolyasiya şəraitində musiqi təhsilinin inkişafdan qalmaması, istedadlı uşaq və gənclərin böyük səhnəyə çıxarılması, onların dəstəklənməsi və yaradıcılıq potensiallarının yüksəldilməsidir.
Bir turdan ibarət I festival-müsabiqə “fortepiano”, “xalq çalğı”, “simli”, “nəfəs alətləri”, “xanəndə”, “vokal”, “estrada oxuma” və “rəsm” ixtisasları üzrə Bakıda fəaliyyət göstərən uşaq musiqi və incəsənət məktəbləri şagirdləri arasında 3 yaş qrupu üzrə (I qrup - 8-11 yaş, II qrup - 12-14 yaş, III qrup - 15-17 yaş) keçirilir.
İştirakçılar ifa müddəti 5 dəqiqəyə qədər olan bir əsərlə müsabiqəyə qatılıblar. Müsabiqə zamanı konsertmeyster çətinliyi nəzərə alınıb. Çıxışlar peşəkar münsiflər heyəti tərəfindən 10 ballı sistem ilə qiymətləndiriləcək. Yerlər və mükafatlar münsiflər heyətinin qərarı ilə müəyyən edilir. Münsiflər heyətinin qərarına əsasən hər nominasiya üzrə I, II, III yerlərə layiq görülmüş iştirakçılar Bakı Şəhər Mədəniyyət Baş İdarəsinin təsis etdiyi müvafiq diplomlarla təltif olunacaq:
I yer - 1 nəfər (hər qrup və hər nominasiya üzrə), I dərəcəli diplom;
II yer - 2 nəfər (hər qrup və hər nominasiya üzrə), II dərəcəli diplom;
III yer - 3 nəfər (hər qrup və hər nominasiya üzrə), III dərəcəli diplom.
Müsabiqədə “Tamaşaçı rəğbətini qazanan iştirakçı”nın seçilməsi də nəzərdə tutulub. Xüsusi fərqlənən iştirakçılar fəxri fərmanlarla təltif ediləcəklər. Tamaşaçılar müsabiqəyə təqdim olunan əsərləri Baş İdarənin internet səhifəsində izləyib bəyəndikləri iştirakçıya səs verə bilərlər.
Səsvermə Böyük Vətən müharibəsinin başa çatdığı gün, mayın 8-dən 9-na keçən gecə bitəcək.
Bölmənin digər xəbərləri
