Hörmətli qonaqlar, həmkarlar və tələbələr!

Hörmətli xanımlar və cənablar!

İcazənizlə, Bolqarıstan Respublikasının Prezidenti möhtərəm cənab Georgi Pırvanova Bakı Slavyan Universitetinin fəxri doktoru diplomunun təqdim olunması mərasimini açıq elan edim.

Sizə böyük məmnuniyyətlə bildirirəm ki, Bakı Slavyan Universiteti Elmi şurasının 2004-cü il 29 sentyabr tarixli geniş iclası Bolqarıstan və Azərbaycan xalqları arasında dostluq münasibətlərinin inkişaf etdirilməsi və möhkəmləndirilməsində, iki dövlət arasında əməkdaşlığın genişləndirilməsində, elm, mədəniyyət, təhsil sahəsində əlaqələrin dərinləşdirilməsində xidmətlərinə görə Bolqarıstan Respublikasının Prezidenti cənab Georgi Pırvanova yekdilliklə Bakı Slavyan Universitetinin fəxri doktoru adı verilməsini qərara almışdır.

Cənab Prezident, mən bu münasibətlə həm Sizi, həm də Bakı Slavyan Universitetinin Elmi şurasını ürəkdən təbrik edirəm.

Bugünkü görüş, şübhəsiz ki, xalqlarımız arasında uzun illərdən bəri mövcud olan səmimi dostluq münasibətlərinin, müasir Azərbaycanda və müasir Bolqarıstanda son illərdə aparılan daxili və xarici siyasətin nəticəsidir. Çox sevindiricidir ki, bu siyasət sayəsində Azərbaycan və Bolqarıstan arasında hərtərəfli əməkdaşlıq uğurla inkişaf etməkdədir. Xalqımızın ümummilli lideri Heydər Əliyevin müdrik dövlət quruculuğunun bəhrəsidir ki, müstəqil Azərbaycan bu gün dünya birliyi ölkələri ilə, regionda nüfuzlu bir dövlət olan Bolqarıstanla qarşılıqlı faydası olan əməkdaşlıq, əsil dostluq münasibətləri qurur. Bu gün biz çox şadıq ki, cənab Prezident Siz və Prezident İlham Əliyev bu münasibətlərin daha da dərinləşməsi və genişlənməsinə çalışırsınız. Sizin ölkəmizə səfərinizi biz bu dostluq münasibətlərinin yeni bir təzahürü kimi qiymətləndirir, universitetimizə gəlişinizdən şərəf duyur, Sizə dərin minnətdarlığımızı bildiririk.

Cənab Prezident!

Hörmətli qonaqlar!

Bu gün artıq qürurla deyə bilərik ki, respublikamızın bir çox slavyan ölkələri, o cümlədən Bolqarıstanla əlaqələrinin inkişafında Bakı Slavyan Universiteti faydalı rol oynayır. Prezident Heydər Əliyevin Fərmanı ilə 2000-ci ildə, 50 illik tarixi olan Rus Dili və Ədəbiyyatı İnstitutunun bazasında yaradılmış Bakı Slavyan Universiteti nadir ixtisaslar üzrə, o cümlədən bolqarşünaslıq üzrə kadr hazırlayan, geniş beynəlxalq əlaqələri olan nüfuzlu təhsil müəssisəsi kimi bu gün bütün regionda tanınır.

Onu da deyim ki, öyrəndiyimiz, tədqiq etdiyimiz ölkələrin mədəniyyət-tədris mərkəzlərinin açılması da bir ənənəyə çevrilməkdədir. BSU-da rus, türk, Ukrayna, yunan mədəniyyət mərkəzləri fəaliyyət göstərir. Bu gün mən fərəh hissi ilə bolqar mədəniyyət mərkəzinin açılışı barədə xəbər verirəm və ikiqat xoşdur ki, cənab Prezident, bu mərkəzi məhz Siz açdınız.

Cənab Prezident, diqqətinizə çatdırmaq istərdim ki, bolqar dili və ədəbiyyatını, Bolqarıstanın tarixini, ictimai-fəlsəfi fikir tarixini, bolqar mədəniyyətini özündə ehtiva edən bolqarşünaslıq ixtisası universitetimizdə layiqli yer tutur. Bu ixtisas üzrə 34 tələbə bakalavr, 6 tələbə isə magist təhsili alır.

Biz bolqar mədəniyyəti, ədəbiyyatı və incəsənətini təkcə BSU-da deyil, respublika miqyasında da ciddi təbliğ edirik. Universitetimizin əməkdaşları və tələbələri tərəfindən bolqar dilindən ədəbi-publisistik əsərlər tərcümə və çap edilir, təhsil ocağımızda bolqar mədəniyyət günləri keçirilir, bolqarşünas tələbələrin elmi və özfəaliyyət dərnəkləri fəaliyyət göstərir. Bu yaxınlarda “Dəyişən dünyada Bolqarıstanın yeri” adlı çox maraqlı tələbə konfransı keçirilmiş, məruzələr çap olunmuşdur.

Cənab Prezident!

Universitetimiz Bolqarıstanın elm və təhsil müəssisələri ilə də sıx əməkdaşlığa çalışır. Belə ki, Müqəddəs Kliment Oxridski adına Sofiya, Yepiskop Konstantin Preslavski adına Şumen universitetləri ilə əməkdaşlıq haqqında müqavilələr imzalamışıq. Tələbə və müəllimlərimiz imkan düşdükcə, həmin ali məktəblərdə ixtisaslarını artırır, yay məktəblərində olurlar. Sofiya Universiteti ilə Bakıda və Sofiyada tələbələrin idman yarışlarını keçirməyi planlaşdırırıq.

Cənab Prezident, Bolqarıstanın BSU ilə əlaqələrə xüsusi diqqət verməyə çalışan çox uzaqgörən müdafiə naziri vardır. Məhz cənab Svinarovun təşəbbüsü və dəvəti ilə bizim 3 əməkdaşımız Bolqarıstanda olmuş, müxtəlif universitetlərlə təmaslar qurmuşlar. Biz çox istərdik ki, bütün bu əlaqələr birdəfəlik olmasın, möhkəm dostluq ənənələrinə çevrilsin.

Arzular böyükdür və onların həyata keçirilməsinə yüksək səviyyədə köməyə ehtiyac duyulduğunu diqqətinizə çatdırmaq istərdim.

Bolqarıstanın bir sıra dövlət adamları, mədəniyyət və təhsil işçiləri, bolqar universitetlərinin nümayəndələri ilə sıx əməkdaşlığımız var. BSU-nun fəxri doktoru, Bolqarıstanın görkəmli dövlət və ictimai xadimi cənab Jelyu Jelev universitetimizdə 10 gün ərzində bolqar dili, mədəniyyəti, tarixi haqqında məruzələrlə çıxış etmişdir.

Sofiya Universitetinin rektoru, tanınmış yazıçı, professor Boyan Biolçev və prorektoru, professor Aleksandr Fedotov BSU-nun qonağı olmuş, tələbə və magistrantlarımız, müəllimlərimizlə maraqlı görüşlər keçirmişlər. Şumen Universitetinin əməkdaşı, doktor Elka Dobreva bir ay universitetimizdə çalışmışdır. Belə canlı təmasların bolqarşünas tələbələrin formalaşmasında böyük rolu vardır.

Deməyi özümə borc bilirəm ki, bizə bu əlaqələrin qurulmasında Bolqarıstanın Azərbaycandakı səfiri, artıq universitetimizin həqiqi dostuna çevrilmiş cənab İvan Palçev yaxından kömək edir. Sizin qarşınızda ona bir daha dərin təşəkkürümü bildirirəm.

İnanırıq ki, Sizinlə, dost və qardaş Bolqarıstan Respublikasının Prezidenti ilə bu görüş tələbə və müəllimlərimizi yeni nailiyyətlərə ruhlandıracaq, BSU ilə Bolqarıstan universitetlərinin əlaqələrinin inkişafına təkan verəcək, xalqlarımız arasında, ümumiyyətlə, regionumuzda qarşılıqlı anlaşma və əməkdaşlıq proseslərinə müsbət təsir göstərəcəkdir. Ona da inanırıq ki, cənab Prezident, Siz nüfuzlu dünya liderlərindən biri kimi, Azərbaycanın haqq səsinə dəstək verəcəksiniz, bizim ən ağrılı problemimiz olan Dağlıq Qarabağ münaqişəsinin həllində ədalətli və qərəzsiz mövqe tutacaqsınız.

Cənab Prezident, əminəm ki, bu gün Sizin BSU-da açdığınız bolqar mədəniyyəti mərkəzi ölkələrimiz və xalqlarımız arasında yeni, möhkəm mənəvi körpü olacaqdır.

İcazə verin, universitetimizə gəlişiniz, professor-müəllim və tələbə kollektivi ilə bu görüşünüz üçün Sizə bir daha təşəkkürümü bildirim, Bakı Slavyan Universitetinin Fəxri doktoru olmağınız münasibətilə Sizi bir daha təbrik edim və fəxri doktor diplomunu və mantiyanı Sizə təqdim edim.

X X X

BSU-nun rektoru professor Kamal Abdullayev Bolqarıstan Respublikasının Prezidenti Georgi Pırvanova universitetin fəxri doktoru diplomunu və mantiyanı təqdim etdi. Qonağa Azərbaycan xalçası da hədiyyə olundu.

X X X

Bolqarıstan Respublikasının Prezidenti mərasimdə nitq söylədi.