BAKIDA “BİOMETRİK SƏNƏDLƏRİN TƏTBİQİ”NƏ HƏSR EDİLMİŞ KONFRANS KEÇİRİLMİŞDİR
AZƏRTAC xəbər verir ki, aprelin 11-də “Park-İnn-Azərbaycan” mehmanxanasında “Biometrik sənədlərin tətbiqi” mövzusunda konfrans keçirilmişdir.
Konfransda DATACARD şirkətinin, Azərbaycanın Daxili İşlər, Ədliyyə, Rabitə və İnformasiya Texnologiyaları, Təhsil, Vergilər, Əmək və Əhalinin Sosial Müdafiəsi, Nəqliyyat, Milli Təhlükəsizlik, Müdafiə, Fövqəladə Hallar Nazirliklərinin, Baş prokurorluğun, Dövlət Statistika Komitəsinin, Dövlət Sosial Müdafiə Fondunun və Xüsusi Dövlət Mühafizə Xidmətinin nümayəndələri iştirak etmişlər.
Bank sektorunda plastik kartların hazırlanması sahəsində fəaliyyəti ilə tanınmış “Azərbaycan Texnologies” (“Aztech”) şirkətinin direktoru Zülfüqar Bayramov rəhbərlik etdiyi müəssisənin fəliyyəti haqqında məlumat vermişdir. Qeyd edilmişdir ki, DATACARD şirkətinə məxsus avadanlığın Azərbaycanda tətbiqinə texniki dəstək məhz “Aztech” tərəfindən həyata keçirilir. Ölkəmizdə yeni biometrik pasportların tətbiqinin gözlənildiyini nəzərə alaraq DATACARD beynəlxalq aləmdə əldə etdiyi təcrübəni Azərbaycanda bölüşmək məqsədi ilə bugünkü konfransın keçirilməsini qərara almışdır.
DATACARD şirkətinin biznes üzrə meneceri Mark Pavit Beynəlxalq Mülki Aviasiya Təşkilatının (İCAO) pasport standartları, şəxsiyyəti təsdiq edən sənədlərin istehsalı, bu prosesin təşkili, hazırlanması zamanı təhlükəsizlik tədbirlərinin həyata keçirilməsində beynəlxalq təcrübə barəsində ətraflı məlumat vermişdir. Bildirilmişdir ki, Azərbaycanda tətbiq edilən pasportlar hazırda beynəlxalq tələblərə cavab versə də, İCAO-nun 9309 saylı sənədi 2015-ci ilədək onların bütün dünyada tətbiq edilən standartlara uyğunlaşdırılmasını nəzərdə tutur. Şəxsiyyət haqqında biometrik məlumatları müfəssəl şəkildə özündə əks etdirəcək pasportlar bir sıra xüsusiyyətləri ilə fərqlənir. Bu sənəd şəxsin bir çox ölkələrə viza açdırmadan getməsinə, orada quraşdırılmış ciplər isə istənilən ölkədə onun maşınlar vasitəsilə oxunmasına imkan verir. Biometrik pasportlar təhlükəsizlik, terroçuların hərəkətinin qarşısının alınması baxımından da əhəmiyyətlidir.
Konfransda biometrik sənədlər, onların hazırlanması texnologiyası, tətbiqi mexanizmləri barədə ətraflı məlumat verilmişdir.
