Bakıda dünya çempionatında çıxış edəcək gimnastlarımızla tanışlıq: Yelizaveta Luzan
Bakı, 28 avqust, AZƏRTAC
Sentyabrın 16-dan 22-dək Bakıda keçiriləcək bədii gimnastika üzrə 37-ci dünya çempionatında Azərbaycan gimnastları doğma meydanda uğur qazanmağa çalışacaqlar. Komandamızın heyətində medal ümidlərindən biri də istedadlı gimnast Yelizaveta Luzandır. Hamının Liza deyə çağırdığı gimnast 2003-cü il martın 14-də Ukraynada anadan olub. O, ailə vəziyyəti ilə əlaqədar 2014-cü ilin sonunda Bakıya köçüb və hazırda anası ilə burada yaşayır. Orta məktəbin XI sinif şagirdi olan Liza filmlərə baxmağı, rəsm çəkməyi, həmçinin kağızdan oriqami düzəltməyi sevir. Gimnastikada onun kumiri Anna Rizatdinovadır. Lizanın gimnastika ilə tanışlığı səkkiz yaşında valideynlərinin istəyi ilə olub. O, cari ildən etibarən böyüklər yaş qrupunda çıxış edir.
AZƏRTAC Yelizaveta Luzanın Azərbaycan Gimnastika Federasiyasının saytına müsahibəsini təqdim edir.
- Liza, nə üçün məhz gimnastikanı seçmisən?
- Uşaqlıqdan televizorda gimnastlara baxanda onların çıxışları çox xoşuma gəlirdi. Xüsusilə, lentlə çıxışları xoşlayırdım və mənə alınan ilk alət də elə lent olub.
- Zəhmət olmasa, bizə bir qədər öz nailiyyətlərin haqqında məlumat verərdin.
- Mən həm milli, həm də bir çox beynəlxalq yarışlarda iştirak etmişəm və medallar qazanmışam. Ötən il İspaniyanın Qvadalaxara şəhərində keçirilmiş Avropa çempionatında lentlə proqramda finala vəsiqə qazandım və altıncı oldum. Elə həmin il Argentinanın paytaxtı Buenos-Ayresdə keçirilən Yeniyetmələrin Yay Olimpiya Oyunlarında qarışıq komanda yarışlarında qızıl medal qazandım.
- Dünya çempionatına hazırlıq necə gedir?
- Yarışa hazırlıq intensiv gedir. Biz səylə çalışırıq. Demək olar ki, hər gün yoxlama məşqlərimiz olur.
- Yəqin ki, rəqiblərin güclü olacaq?
- Mən rəqiblərlə deyil, ilk növbədə, özümlə mübarizə aparmalıyam. İndi mənim üçün əsas vəzifə fərdi proqram üzrə çıxışda yer qazanmaq deyil, mən komanda hesabında mübarizə aparacağam. Çox istəyirəm ki, yaxşı mübarizə aparım və komandamıza kömək edim.
- Bədii gimnastikada səni daha çox nə cəlb edir?
- Bədii gimnastikada musiqinin müşayiəti ilə emosiyaları ifadə etmək bu idman növündə ən çox sevdiyim cəhətdir. Gimnastların həmişə gözəl və parlaq geyimləri olur. Bədii gimnastika həm də çox zərif idman növüdür.
- Hansı alətlə çıxış etmək daha çətindir?
- Hər bir alətin öz çətinliyi var. Məsələn, lent dolaşa bilər, gürzlərin isə sayı ikidir və onlara nəzarət etmək lazımdır. Mənə gürzlərlə çıxış etmək daha çətindir.
- Bəs məşqlər vaxtı sənin üçün nə çətin olur?
- Hər gün fərqli olur. Əsas odur ki, başlayasan, sonra hər şey qaydasına düşür.
- Yarışlardan əvvəl sakitləşmək, həyəcana üstün gəlmək üçün nə edirsən?
- Məşqçilər mənə sakitləşməkdə kömək edirlər. Mən özüm də sakit olmağa, həyəcanlanmamağa çalışıram. Çıxışdan öncə hər şeyi yoxlamalıyam, yalnız bundan sonra yarış xalçasına çıxmağa hazır oluram. Ən əsası çıxışa başlamaqdır. Mənim üçün ən çətin məqam budur, amma sonra daha sakit oluram. Tamaşaçıların alqışını görmək çox xoş olur. Bu, mənə müsbət təsir göstərir.
- Gimnast kimi əsas məqsədin nədir?
- Böyüklərin Olimpiya Oyunlarında çıxış etmək və yaddaşlarda qalmaq istərdim.
Bölmənin digər xəbərləri
