BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, noyabrın 3-də Bakı şəhərinin 7 rayonunda əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun olaraq, əsasən meyvə, bostan və tərəvəz məhsulları çıxarılmışdı.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada satışa Salyan, Qusar, Dəvəçi, Astara və digər rayonlardan gətirilmiş 70 tona yaxın müxtəlif çeşidli kənd təsərrüfatı məhsulları çıxarılmışdı. Üzüm, nar, heyva, lobya, badımcan, xiyar və digər məhsullar satan salyanlı Heydər Fərəcov bildirdi ki, iki ildir hər həftə yarmarkaya məhsul gətirir. İndiyə qədər burada 20 tondan çox meyvə-tərəvəz satmışdır.
Qusarlı Kərəm Məmmədov isə ilk dəfədir buraya məhsul gətirdiyini söylədi. Onun satışa çıxardığı 3 ton kartofun alıcıları məhsulun qiyməti və keyfiyyətindən razılıq edirdilər.
Yarmarkada satılan məhsulların qiyməti bazardakından 35-40 faiz ucuz idi.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada əsl qələbəlik idi. Yaradılmış məhsul bolluğu bura üz tutanların sayını xeyli dərəcədə artırmışdı. Yarmarkaya Saatlı, Salyan, Ağdaş, Masallı və digər rayonlardan 20 tona yaxın məhsul gətirilmişdi. Burada kələmin kiloqramı 20-30, kartof 50-60, soğan 25, mal əti 3 manat 60 qəpiyə təklif edilirdi.
Alıcılar Dadaş Şabanov, Xanım Qurbanova və başqaları yaradılmış məhsul bolluğundan razılıq edir, məhsulların keyfiyyətini tərifləyirdilər.
“Təzə bazar” MMC-nin həyətindəki yarmarkada alıcılara Sabirabad, Salyan, Gədəbəy, Tovuz, Hacıqabul və digər rayonlardan gətirilmiş geniş çeşiddə kənd təsərrüfatı məhsulları təklif olunurdu.
Bərdə yağ-pendir zavodunun işçisi Müşfiq Əmənov camış qatığı, zaqatalalı Abuzər Babayev şabalıd, qoz, fındıq, sabirabadlı Güləbətin Məmiyeva heyva, nar, salyanlı Fəxrəddin Cəfərov alma, narıngi, üzüm, xurma satırdılar.
Kənd Təsərrüfatı Nazirliyi mətbuat xidmətinin rəhbəri Murtuzəli Hacıyev bildirdi ki, bu gün yarmarkaya 24,3 ton məhsul, o cümlədən 4 ton ət, 0,3 ton süd, 10 ton tərəvəz, 7 ton meyvə, 3 ton kartof, 15 min ədəd yumurta və s. gətirilmişdir. Qiymətlər bazardakından 20-25 faiz aşağıdır.
Suraxanıda “Günəş” ticarət mərkəzindəki yarmarkada Qobustan, Balakən, Samux, Daşkəsən, Cəlilabad, Salyan və Biləsuvar rayonlarının fermərləri satışa 57 tondan çox məhsul çıxarmışdılar. Kənd
Təsərrüfatı Nazirliyinin nümayəndəsi Mustafa Rüstəmov dedi ki, burada satılan məhsulların qiymətləri bazardakından 25 faizə qədər ucuzdur. Satışda meyvə-tərəvəz, bitkiçilik məhsulları, ət-süd məmulatları vardır. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə cəlilabadlı fermerlər satışa 5 tondan çox məhsul çıxarmışdılar. Kənd Təsərrüfatı Nazirliyinin təmsilçisi Səfəralı Nəsirovun sözlərinə görə, qiymətləri bazardakından 25 faiz ucuz olan yarmarkada heyvanlar baytar nəzarəti altında kəsilir və əhaliyə təklif olunur.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində Salyan, Kürdəmir, Quba, Şəmkir, Ağcabədi, Qax, Biləsuvar, Qəbələ və Şəki rayonlarının fermerləri əhaliyə müxtəlif çeşiddə kənd təsərrüfatı məhsulları, o cümlədən meyvə-tərəvəz, ağartı, ət, konserv məhsulları, bal və s. təklif edirdilər.
Kənd Təsərrüfatı Nazirliyinin nümayəndəsi Atəş Nuriyev bildirdi ki, rayonun ərazisində fəaliyyət göstərən yarmarkada satışa 226 ton kənd təsərrüfatı məhsulu çıxarılmışdır. Şəmkirli fermerlərin yarmarkaya gətirdikləri kartofun alıcıları daha çox olmuşdur.
Binəqədi rayonunda 6 nömrəli Bakı Texniki Peşə liseyinin qarşısındakı yarmarkada şəhər sakinlərinə Ağstafa, Goranboy və Bərdə rayonlarının fermerləri müxtəlif çeşiddə kənd təsərrüfatı məhsulları təklif edirdilər. Qiymətləri bazardakından ucuz olan bu məhsullar, xüsusilə süd məhsulları çox həvəslə alınırdı.
Kənd Təsərrüfatı Nazirliyinin nümayəndəsi Sabir Əhədov bildirmişdir ki, bu gün satışa 27 ton meyvə-tərəvəz və heyvandarlıq məhsulları çıxarılmışdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısında təşkil olunmuş yarmarkada Qazax və Ağsu rayonlarından gətirilmiş lobyanın kiloqramı 30-40, soğanın və kələmin kiloqramı 20, kartofun kiloqramı 35-40 qəpiyə satılırdı. Yarmarkaya 25 tondan çox məhsul çıxarılmışdı.
Nərimanov rayonundakı Keşlə ticarət mərkəzində təşkil olunmuş yarmarkada Xaçmaz, İmişli, Tovuz, Astara, Salyan, Neftçala, Oğuz və Qobustan fermerləri satışa 92,6 ton kənd təsərrüfatı məhsulları çıxarmışlar.
Kənd Təsərrüfatı Nazirliyinin nümayəndəsi Savalan Seyfəddinov bildirdi ki, bu gün paytaxt sakinlərinə 35 adda kənd təsərrüfatı məhsulları təklif olunmuşdur.
Paytaxtda satış-yarmarkalar bazar günü də davam etdiriləcəkdir.
Bölmənin digər xəbərləri
