BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, mayın 11-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və Göyçay rayonlarından müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, bazar günü burada əhaliyə 12 ton məhsul, o cümlədən 1,5 ton ət, 0,25 ton ağartı, 4 ton tərəvəz, 5 ton kartof, 0,25 ton bostan bitkisi, 1 ton meyvə, 9 min ədəd yumurta, 20 kiloqram bal təklif edilmişdir. Şənbə və bazar günləri burada 27,5 ton məhsul satılmışdır. Yarmarkada qiymətlər bazardakından 20-25 faiz aşağı olmuşdur. Mal ətinin kiloqramı 4 manata, qoyun əti 4 manat 20 qəpiyə, quş əti 3 manat 80 qəpiyə, kök 40-50, kələm, çuğundur 50, turp 40, kartof 50-60, xiyar, badımcan 60-80, göyərtinin dəstəsi 10-15 qəpiyə, alma 1 manat-1 manat 20 qəpiyə, armud 1 manat 50 qəpiyə, bal 9-10 manata, pendir 2 manat 30-2 manat 50 qəpiyə, çiyələk 2 manata, alça 1 manat 60 qəpiyə, gilas 2 manata satılmışdır.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində şəhər əhalisi satışa çıxarılan kənd təsərrüfatı məhsullarının bolluğundan razılıq edirdilər.
İşçi qrupunun qərargahından verilən məlumata görə, şənbə və bazar günləri bu yarmarkada Salyan, Kürdəmir, Quba, Şəmkir, Ağcabədi, Qax, Biləsuvar, Qəbələ və Şəki rayonlarından gətirilmiş 30 ton kartof, 23,1 ton meyvə, 9 ton ət, 1,7 ton ağartı, min ədəd yumurta və digər kənd təsərrüfatı məhsulları satılmışdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Ağsu rayon icra hakimiyyəti başçısının müavini Elxan Abdullayev bildirmişdir ki, şənbə və bazar günləri rayonun fermerləri satışa 13 tonadək məhsul çıxarmışlar. Onun 1,2 tonu kələm, 2,8 tonu soğan, 800 kiloqramı isə badımcan olmuşdur.
Qazax və Ağsu rayonlarından, ümumilikdə, yarmarkaya gətirilmiş 30 tonadək meyvə-tərəvəz və süd məhsulları bazarlarla müqayisədə 25-30 faiz ucuz qiymətlərə əhaliyə satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada şəhər sakinlərinə Goranboy, Ağstafa və Bərdədən gətirilmiş 15 tondan çox kənd təsərrüfatı məhsulları, o cümlədən kartof, alma, kök, soğan, çuğundur, süd və s. ucuz qiymətlərə təklif olunmuşdur.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermərləri iki gün ərzində 20 tona yaxım məhsul satmışlar.
Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkada satılan məhsulların qiyməti bazardakından 30-35 faizə qədər ucuzdur. Alıcılar geniş seçim imkanına malikdirlər, çünki burada meyvə-tərəvəz, bitkiçilik məhsulları, ət-süd məmulatları, konservləşdirilmiş məhsullar boldur. Şəhər sakinləri məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri şənbə və bazar günləri bazardakından 25-35 faiz ucuz qiymətə müxtəlif çeşiddə kənd təsərrüfatı məhsulları satmışlar.
Nərimanov rayonu, Keşlə ticarət mərkəzində təşkil olunmuş yarmarkada şənbə və bazar günləri Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz, Qobustan rayonlarının fermerləri əhaliyə müxtəlif çeşiddə 42,1 ton məhsul təklif etmişlər. Burada göyərtinin dəstəsi 10 qəpiyə, soğanın kiloqramı 30, alma, çuğundur 40, kartof 40-60, badımcan, kök 70, xiyar 60, bibər 15 qəpiyə, qoz 2 manat 20 qəpiyə, pomidor 2, mal əti 4 manata, qoyun əti 4 manat 20 qəpiyə, quş əti 3 manat 80 qəpiyə, pendir 2 manat 40 qəpiyə, yumurtanın bir ədədi 8 qəpiyə satılmışdır.
######
 |
 |
Bölmənin digər xəbərləri
