BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, avqustun 24-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, “Təzə bazar” MMC-nin həyətindəki yarmarkaya bazar günü Sabirabad, Zərdab, Gədəbəy, Hacıqabul və digər rayonlardan 16 tondan çox kənd təsərrüfatı məhsulu, o cümlədən 1 ton ət, 0,2 ton ağartı, 6 ton tərəvəz, 1,5 ton kartof, 3,8 ton meyvə, 10 min yumurta gətirilmişdir. Qiymətlər bazardakından 20-25 faiz aşağı olmuşdur. Qoyun ətinin kiloqramı 4 manat 50 qəpiyə, mal əti 4 manat 20 qəpiyə, quş əti 3 manat 80 qəpik - 4 manata, bal 9-10 manata, armud 70-80, alma 30-60, çuğundur, yerkökü 60-80, pomidor, kartof, badımcan 20-40, soğan, kələm 50, yumurtanın bir ədədi 7-10, göyərtinin dəstəsi 10-15 qəpiyə satılmışdır.
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkaya Salyan, Qusar, Dəvəçi və digər rayonlardan ümumilikdə 75 tondan çox məhsul gətirilmişdir.
Paytaxt sakinləri mal və qoyun ətini, meyvə-tərəvəzi, konserv və taxıl məhsullarını, şirələri, un məmulatlarını, ağartını və yumurtanı həvəslə almışdılar. Alıcılardan Almaz Allahyarov, Şahin İmranov və başqaları yarmarkada məhsulların keyfiyyətinə və qiymətlərə ciddi nəzarət olunduğunu, bazardakından 30-40 faiz aşağı qiymətə satıldığını bildirmişlər.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında, “Bülbülə” kiçik müəssisəsinin “Azər” ticarət mərkəzində təşkil olunmuş yarmarkada satılan meyvə-tərəvəzin, bostan və süd məhsullarının qiymətləri xeyli ucuz olduğundan sakinlər burada bazarlıq etməyə daha çox maraq göstərmişlər. Şənbə və bazar günlərində Ağcabədi, Biləsuvar, Salyan, Şəmkir, Kürdəmir və digər rayonların fermerləri yarmarkaya 262 tonadək cürbəcür çeşiddə məhsul gətirmişlər.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki, Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba Biləsuvar və Cəlilabad rayonlarının fermerləri iki gün ərzində 66 tondan çox məhsul satmışlar. Alıcılar qiyməti bazardakından 30-35 faizə qədər ucuz olan meyvə-tərəvəzin, bitkiçilik məhsullarının, ət-süd məmulatlarının, konservlərin keyfiyyətindən də razı qalmışlar.
Biləcəri qəsəbəsi, Məlik Aslanov küçəsi, 284 nömrəli orta məktəbin, Binəqədi rayonunda 6 nömrəli Bakı Texniki Peşə Liseyinin qarşısındakı yarmarkalarda müştərilərə Bərdə, Goranboy, Ağstafa, Ağsu və Qazax rayonlarından gətirilmiş kənd təsərrüfatı məhsulları təklif olunmuşdur.
Nərimanov rayonunda Əliyar Əliyev küçəsi, 26-da təşkil olunmuş yarmarkada isə Xaçmaz, Neftçala, İmişli, Daşkəsən, Beyləqan, Oğuz, Tovuz, Tərtər və digər rayonların fermerləri satışa 47 ton kənd təsərrüfatı məhsulu çıxarmışlar. Fermerlər və alıcılar yarmarkanın təşkilindən razılıqlarını bildirmişlər.
######
Bölmənin digər xəbərləri
