BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, noyabrın 2-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy və digər rayonlardan 16,83 ton kənd təsərrüfatı məhsulları, o cümlədən 2,7 ton ət, 0,3 ton ağartı, 5,5 ton tərəvəz, 6 ton meyvə, 3 ton kartof, 6 min yumurta gətirilmişdi. Gədəbəyli Asif Hacıyev alıcılara kiloqramı 30-50 qəpikdən 3 tondan çox kartof, 30-40 qəpikdən soğan və 40-60 qəpikdən alma təklif edirdi.
Kənd Təsərrüfatı Nazirliyinin nümayəndəsi Fərhad Qəmbərov dedi ki, şənbə və bazar günləri yarmarkada 38 tondan çox məhsul satılmışdır. Qiymətlər bazara nisbətən 20-25 faiz ucuz olmuşdur.
Metronun “Əhmədli” stansiyasının yaxınlığında, “Azər” ticarət mərkəzində şənbə və bazar günləri satışa Salyan, Kürdəmir, Quba, Şəmkir, Ağcabədi, Biləsuvar və Qəbələ rayonlarından gətirilmiş 1,5 ton ağartı, 101 ton meyvə, 112 ton tərəvəz, 50 ton kartof və digər məhsullar çıxarılmışdı.
Suraxanıda “Günəş” ticarət mərkəzindəki yarmarkada Balakən, Gədəbəy, Samux, Daşkəsən, Quba, Biləsuvar rayonlarının fermerləri iki gün ərzində 63 ton məhsul satmışlar. Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə, yarmarkaya çıxarılan məhsulların çeşidi artırılmışdır. Satılan məhsulların qiyməti bazardakından 30-35 faizə qədər ucuz olmuşdur. Satışda meyvə tərəvəz, bitkiçilik məhsulları, ət-süd məmulatları, konservləşdirilmiş məhsullar çoxluq təşkil etmişdir. Alıcılar məhsulun qiymətindən və keyfiyyətindən razı qalmışlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri sakinlərə 11 tona yaxın məhsul təklif etmişlər. Burada da qiymətlər bazardakından 30-35 faiz ucuz olmuşdur.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkaya Salyan, Quba, Xaçmaz, Astara və digər rayonlardan 80 tondan çox məhsul gətirilmişdi. Təklif edilən məhsulların qiymətləri münasib olduğundan sakinlər həvəslə alırdılar. Yarmarkada alış-veriş üçün hər cür şərait yaradılmışdı, məhsulların keyfiyyətinə ciddi nəzarət edilirdi.
Kənd Təsərrüfatı Nazirliyinin nümayəndəsi F.Eminov bildirmişdir ki, şənbə və bazar günləri Nərimanov rayonunun Ə.Əliyev küçəsindəki yarmarkada Xaçmaz, İmişli, Tərtər, Tovuz, Oğuz, Astara rayonlarının fermerləri 49,6 ton kənd təsərrüfatı məhsulları satmışlar.
Xaçmaz Rayon İcra Hakimiyyətinin nümayəndəsi Ceyhun Bayramov məlumat vermişdir ki, rayondan 22,7 ton məhsul gətirilmişdir. Xaçmazlılar bundan sonra da yarmarkalarda mütəşəkkil iştirak edəcəklər.
######
 |
 |
Bölmənin digər xəbərləri
