BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 27 fevral (AZƏRTAC). Fevralın 27-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Gədəbəy, Hacıqabul və digər rayonlardan 11 tondan çox məhsul gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, yarmarkada qiymətlər bazardakından 20-25 faiz ucuzdur. Qoyun ətinin kiloqramı 4 manat 50 qəpiyə, mal əti 4 manata, soğan və kartof 50 qəpiyə, yumurtanın biri 8 qəpiyə və s. satılır.
Bakı Rabitə və Nəqliyyat Kollecinin həyətində təşkil olunan yarmarkada Kənd Təsərrüfatı Nazirliyinin nümayəndəsi Saleh Zərbəliyev məlumat verdi ki, Salyan, Quba, Qusar, Astara, Dəvəçi rayonlarının fermerləri və şəxsi təsərrüfat sahibləri satışa 83,4 ton məhsul çıxarmışlar. Bu, son iki ayda ən yüksək göstəricidir. Həmişə olduğu kimi, bu dəfə də Salyan rayonu həm məhsulun kəmiyyətinə, həm də çeşidin müxtəlifliyinə görə birincidir. Yarmarkaya gətirilmiş məhsulun təqribən yarısı bu rayonun payına düşür.
Salyanın “Hacı Camalxan” kəndli fermer təsərrüfatını təmsil edən Natiq Babayev demişdir ki, paytaxtda kənd təsərrüfatı məhsullarının yarmarkası açılandan bəri hər həftə satışa məhsul çıxarıram. Alıcılara təsərrüfatımızda yetişdirilən müxtəlif çeşidli məhsulları təklif edirəm. Bu müddətdə şəhər sakinləri ilə mehriban münasibət qurmuşuq. Hərdən mənə bu və ya digər məhsulu da sifariş verirlər. Məhsullarımızı alıcılara bazarlardakından 30-40 faiz, hətta bəzilərini yarıbayarı ucuz satırıq.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkada alıcılara Ağdaş, Salyan Masallı, Sabirabad, Quba, Biləsuvar və digər rayonlardan gətirilmiş 15 tondan çox kənd təsərrüfatı məhsulları təklif olunurdu. Giləzi və Hacqabul quşçuluq fabriklərinin nümayəndələri isə satışa 7 min 200 ədəd yumurta çıxarmışdılar.
Kənd Təsərrüfatı Nazirliyinin nümayəndəsi Məmməd Həziyevin sözlərinə görə, yarmarkada əhalinin daha çox ehtiyac duyduğu məhsullara üstünlük verilir və onların həcmi get-gedə artırılır. Becərdikləri məhsulları burada satmaq fermerlərimizə sərf edir, çünki mallarını əlavə xərclər ödəmədən pula çevirə bilirlər.
Metronun “Əhmədli” stansiyasının yaxınlığında, “Azər” ticarət mərkəzində paytaxt sakinləri bazardakından xeyli ucuz olan məhsulları həvəslə alırdılar. Yarmarkada onlara Ağcabədi, Şəmkir, Quba, Kürdəmir, Qax, Biləsuvar və digər rayonlardan gətirilmiş alma, kartof, soğan, kələm, bal və heyvandarlıq məhsulları təklif olunurdu.
Kənd Təsərrüfatı Nazirliyinin nümayəndəsi Vahid Zərgərov bildirdi ki, bu gün alıcılara 245 ton məhsul təklif olunur. Bakılıların kənd təsərrüfatı məhsulları ilə təmin edilməsində şəmkirlilər daha çox fərqlənirlər.
Suraxanı rayonunda “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində təşkil olunmuş yarmarkalarda mövsümi meyvə-tərəvəz məhsulları satılırdı.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, yarmarkalarda şəhər sakinlərinə Samux, Daşkəsən, Quba, Biləsuvar və Cəlilabad rayonlarından gətirilmiş 40 tona yaxın məhsul təklif olunur. Məhsulun bolluğu və çeşidlərin müxtəlifliyi qiymətlərə də təsir göstərmişdir. Kartof, soğan, yerkökü, kələm, ət, süd, alma, armud, qoz, fındıq, xurma, sitrus meyvələri - feyxoa, naringi, kivi, portağal, eləcə də istixana şəraitində yetişdirilmiş göyərti, xiyar, pomidor və digər məhsullar bazarlarla müqayisədə 20-25 faiz ucuz qiymətə satılır. Yarmarkalarda məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Biləcəri qəsəbəsi, Məlik Aslanov küçəsi, 284 nömrəli orta məktəbin yaxınlığındakı yarmarkada Ağsu və Qazaxdan gətirilmiş 16 tonadək kənd təsərrüfatı məhsulları satılırdı. Şəhər sakinləri qiymətlərin ucuzluğundan, məhsulların keyfiyyətindən razılıq edirdilər.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə satışa Ağstafa, Goranboy və Bərdədən gətirilmiş meyvə-tərəvəz, bostan məhsulları çıxarılmışdı.
Kənd Təsərrüfatı Nazirliyinin nümayəndəsi Vidadi Bayramov bildirmişdir ki, Nərimanov rayonu Ə.Əliyev küçəsindəki yarmarkaya Xaçmaz, Tovuz, Daşkəsən, Astara, İmişli, Neftçala, Oğuz, Beyləqan rayonlarından 24 ton məhsul gətirilmişdir.
Novruz çərşənbəsinə hazırlıq üçün quru meyvələr, qoz və fındığın çoxluğu nəzərə çarpırdı və ən çox alınan da məhz həmin məhsullar idi.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######
Bölmənin digər xəbərləri
