Bakı, 5 sentyabr (AZƏRTAC). Sentyabrın 5-də Azərbaycan Respublikası Atçılıq Federasiyasının təşkilatçılığı ilə Bakıdakı Binə Atçılıq Mərkəzinin “Elite Horse and Polo Klub”unda polo üzrə ikinci dünya kuboku yarışlarının açılış mərasimi keçirilib.

AZƏRTAC xəbər verir ki, mərasimdə çıxış edən Azərbaycan Respublikası Atçılıq Federasiyasının (ARAF) prezidenti Elçin Quliyev ötən il Bakıda keçirilmiş birinci dünya kubokundakı uğurlardan danışıb, respublikamızda idmana göstərilən dövlət qayğısından söhbət açıb.

Polo üzrə beynəlxalq idman yarışının ölkəmizdə ikinci dəfə təşkil olunduğunu diqqətə çatdıran E.Quliyev ARAF-ın həyata keçirdiyi layihələr barədə məlumat verib. Qeyd edib ki, polo Azərbaycanın tarixi və məşhur idman növlərindən olan çövkənin müasir və dəyişdirilmiş formasıdır. Polo Azərbaycanda tanınan bir idman növüdür. Artıq ölkəmizdə polo üzrə milli komanda yaradılıb. ARAF Beynəlxalq Polo Federasiyasına tamhüquqlu üzv qəbul edilib.

Tədbirdə diqqətə çatdırılıb ki, Azərbaycanda polonun qədim növü olan çövkən UNESCO-nun Təcili Qorunmaya Ehtiyacı Olan Qeyri-Maddi Mədəni İrs Siyahısına daxil edilib. Yarışların Bakıda keçirilməsi artıq beynəlxalq miqyasda idman ölkəsi kimi tanınan Azərbaycanda polonu inkişaf etdirmək üçün çox mühüm vasitədir.

Vurğulanıb ki, bu ilki beynəlxalq turnirdə Azərbaycan milli polo komandasının debütü olacaq. Azərbaycan yığması polonun qədim növü olan çövkənlə məşğul olan oyunçulardan ibarətdir. Azərbaycanın polo komandası tarixində ilk dəfə Argentinada peşəkar məşqçilər tərəfindən təlim keçib və yarışa yüksək səviyyədə hazırlaşıb.

Sonra yarış açıq elan edilib.

Azərbaycanın dövlət himni səsləndirildikdən sonra çövkən oyununun tarixi barədə məlumat verilib.

Milli geyimli qız və oğlanlar at belində meydana daxil olublar. At belində nümunəvi çıxışlar təqdim edilib.

“Azərbaycan komandasını qarşılayın” devizi ilə keçirilən yarışda ölkəmizlə yanaşı, Argentina, ABŞ və Avropa üzrə dörd beynəlxalq peşəkar komanda iştirak edir. Komandalar dünya şöhrətli “Chopard”, “Maserati”, “Baltika 7” və “Embawood” brendlərini, eləcə də digər sponsorları təmsil edirlər.

Daha sonra komandalar arasında oyunlara start verilib.

Tədbir çərçivəsində sentyabrın 6-da dünyada məşhur olan “İn-Grid” və “I Love İtaly” qruplarının konserti təşkil olunacaqdır.

Sentyabrın 7-də isə yarışların bağlanış mərasimi keçiriləcək.