“BANK OF BAKU”ASC-NİN MÜDDƏTLİ DEPOZİTLƏRİ 12,3 MİLYON MANAT ARTMIŞDIR
Cari il yanvarın 10-dan aprelin 15-dək keçirilən stimullaşdırıcı əmanət kampaniyasına yekun vurulmuşdur. Kampaniyanın şərtlərinə əsasən, bankda minimum 100 AZN/USD/EUR əmanət hesabı açan fiziki şəxs 20 faizədək illik gəlir qazanmaq imkanına malik olur. Bankda əmanət hesabı açan müştərilərə uduş fondu 30 min manat olan uduşlu lotereyada iştirak etmək hüququ verilmişdir.
AZƏRTAC xəbər verir ki, əmanət kampaniyasının uduş mərasimi keçirilmişdir. Kampaniyanın şərtlərinə görə, 100 nəfər əmanətçi hər biri 100 manat, 10 nəfər əmanətçi isə hər biri 1000 manat əldə etmişdir. 10 min manat məbləğində olan super-prizin qalibi isə **41001DN005043 nömrəli kodun sahibi M.Ağacanov olmuşdur.
Uduş prosesinin obyektivliyini təmin etmək məqsədi ilə bank tərəfindən “Fineko” Analitik İnformasiya Agentliyi, “Consulting&Business” jurnalı, Azərbaycan Marketinq Cəmiyyəti, İmperial Tobacco və MBASK sığorta şirkətləri nümayəndələrindən ibarət komissiya təşkil olunmuşdur.
Fiziki şəxslərin müddətli depozitləri birinci rübün sonunda artaraq 54,7 milyon manata çatmışdır.
Bəzi əmanətçilərin istəyi nəzərə alınaraq, bank rəhbərliyinin qərarı ilə əmanət kampaniyası iyulun 31-dək uzadılmışdır. Kampaniya üzrə faiz dərəcələri olduğu kimi qalaraq (20 faizədək illik gəlir), uduş fondunun ümumi məbləği 40 min manatadək artırılmışdır. Cari kampaniyanın şərtlərinə əsasən, 100 nəfər əmanətçi hər biri 100 manat, 10 nəfər əmanətçi hər biri 1000 manat, 1 əmanətçi isə 10 min manat deyil, indi 20 min qazanmaq şansını əldə edəcəkdir.
Uduş mərasimi avqustun 5-də keçiriləcəkdir.
