“BANK RESPUBLİKA” YENİYETMƏLƏR ÜÇÜN İLK PLASTİK KART TƏQDİM EDİR
AZƏRTAC xəbər verir ki, “Bank Respublika” yeniyetmələr üçün ilk plastik kart olan “İlk kart”ı müştərilərə təqdim etməyə başlamışdır.
Kart VISA Electron kartının əsasında buraxılmışdır və 200-dək ölkənin ərazisində bankomatlardan nağd pul çıxarılması, mal və xidmətlərin ticarət-xidmət müəssisələrində nağdsız ödənişi, həmçinin internet şəbəkəsində elektron ödənişlər üçün istifadə oluna bilər.
Yetkinlik yaşına çatmamış şəxs üçün “İlk kart” onun valideyni və ya yetkinlik yaşına çatmış digər şəxs tərəfindən sifariş edilə bilər. “İlk kart” yetkinlik yaşına çatmış şəxsin (sifarişçinin) bank hesabına əlavə kart kimi buraxılır və onunla aparılan bütün əməliyyatlar sifarişçinin bank hesabı üzrə həyata keçirilir. Sifarişçi əməliyyatların həcmini məhdudlaşdırmaq üçün “İlk kart” ilə əməliyyatların məbləğinə gündəlik, həftəlik və ya aylıq limit təyin edə bilər.
Ailə üzvləri üçün sifariş olunduqda “İlk kart” pulsuz və illik xidmət haqqı olmadan verilir. “İlk kart”, həmçinin digər hallarda hesab üzrə buraxılan birinci əlavə kart olduqda da pulsuz verilir.
“İlk kart” üzrə əməliyyatlar “Bank Respublika”nın plastik kart müştəriləri arasında keçirdiyi uduş kampaniyalarında da iştirak edir.
