Bakı, 30 sentyabr, AZƏRTAC

SOCAR-ın Bakı Ali Neft Məktəbinin (BANM) “Dərbəndqala - BHOS” komandası Türkiyənin Antalya şəhərində keçirilən "Teknofest" aerokosmik və texnologiya festivalında “Bəşəriyyət naminə texnologiyalar” üzrə sosial innovasiyalar kateqoriyasında ikinci yeri tutub.

BANM-dən AZƏRTAC-a bildirilib ki, komandanın elmi rəhbəri ali məktəbin İnnovasiya və tədqiqatlar mərkəzinin böyük mühəndisi Emiliya Əhmədova, üzvləri isə Proseslərin avtomatlaşdırılması ixtisasının 4-cü kurs tələbələri Zahid Abdullayev, Rəna İsayeva, Rəvan Xıdırov və Biznesin idarə edilməsi ixtisasının 4-cü kurs tələbəsi Murad Əliyevdir.

“Dərbəndqala - BHOS” komandası öz kateqoriyası üzrə ən yüksək bal (97 bal) toplayaraq birinciliklə “Teknofest” finalına vəsiqə qazanıb. Finalda isə 86,31 toplayaraq yarışı ikinciliklə bitirib. Bununla yanaşı, “Dərbəndqala - BHOS” komandası öz kateqoriyasında finala vəsiqə qazanmış yeganə xarici komanda olub.

Komanda 50,000 TL dəyərində pul mükafatına layiq görülüb. Mükafatlandırma mərasimi oktyabrın 2-6-da Adanada baş tutacaq.

Xatırladaq ki, Ali Məktəbin “BHOSWARE” komandası festivalın “Hackmasters” kateqoriyası üzrə keçirilən CTF yarışında I yeri qazanmışdı. Komanda 180,000 TL dəyərində pul mükafatına layiq görülmüşdü.