BDU-nun “Oxu klubu”nda tələbələrlə görüş olub
Bakı, 20 oktyabr, AZƏRTAC
Bakı Dövlət Universitetinin (BDU) Psixoloji yardım sektorunun təşəbbüsü ilə yaradılmış “Oxu klubu”nun yeni tədris ilində tələbələrlə ilk görüşü keçirilib.
BDU-dan AZƏRTAC-a bildirilib ki, klubun rəhbəri, psixoloq İlkanə Mənsumova “Oxu klubu”nun yaradılma məqsədi və fəaliyyət istiqamətləri barədə məlumat verib. O bildirib ki, klub tələbələrdə mütaliə vərdişini gücləndirmək, düşünmə və təhlil bacarıqlarını inkişaf etdirmək, psixoloji və şəxsi inkişaf mövzularında maarifləndirməni təşviq etməyə xidmət göstərir.
Görüş zamanı iştirakçılarla oxu mədəniyyətinin şəxsiyyətin formalaşmasında, emosional zənginlik və sosial bacarıqların inkişafında rolu barədə müzakirələr aparılıb. Tələbələrə ilk müzakirə ediləcək ədəbiyyat təqdim olunub və növbəti görüş üçün tapşırıqlar verilib.
Qeyd olunub ki, “Oxu klubu” il ərzində həftəlik görüşlər təşkil edəcək. Hər görüşdə müxtəlif janr və mövzularda ədəbiyyatların birgə oxunması və müzakirəsi planlaşdırılır. Bununla yanaşı, tələbələrin fəal iştirakı, fikir mübadiləsi və yaradıcı düşüncə mühitinin formalaşdırılması da əsas məqsədlərdəndir.
Bölmənin digər xəbərləri
