Bədən Tərbiyəsi və İdman Akademiyasında parkur idmanının təqdimatı olub
Bakı, 7 aprel, AZƏRTAC
Gənclər və İdman Nazirliyinin, İsveçrənin ölkəmizdəki səfirliyinin təşkilatçılığı ilə aprelin 7-də Azərbaycan Dövlət Bədən Tərbiyəsi və İdman Akademiyasında (ADBTİA) parkur idman növünün təqdimat mərasimi keçirilib.
AZƏRTAC xəbər verir ki, tədbirdə çıxış edən ADBTİA-nın rektoru Fuad Hacıyev ümummilli lider Heydər Əliyevin idmana daim xüsusi önəm verdiyini vurğulayıb. O, Ulu Öndərin ideyalarının Prezident İlham Əliyev tərəfindən qətiyyətlə həyata keçirildiyini bildirib, son illər Azərbaycanın idman sahəsində qazandığı mühüm nailiyyətlərdən bəhs edib. ADBTİA-nın fəaliyyəti barədə məlumat verən F.Hacıyev parkur idmanının gənclər arasında geniş təbliğ və tədris edilməsini təqdirəlayiq hal kimi dəyərləndirib.
İsveçrənin Azərbaycandakı səfiri Filip Ştalder parkur idmanı haqqında məlumat verərək deyib ki, idmanın bu növü 1980-ci illərdə hərbi maneə təlimlərinin verdiyi ilham nəticəsində yaranıb. Parkur bu gün akrobatik ekstremal idman növünə çevrilib. Bu idman növündə divar, baryerlər, ağaclar, pilləkənlər və s. elementlərindən maneə kimi istifadə olunur. İdmançılar qaçış, dırmanma, yellənmə, tullanma, təkanvermə və s. hərəkətlərdən istifadə edərək bu maneələri mümkün qədər effektli və sürətlə keçməlidirlər.
Çıxışlardan sonra İsveçrənin Lozanna şəhərində fəaliyyət göstərən “X-Trem Move” idman assosiasiyasının üzvləri Kevin Krupi və Yoann Roiq master klass və sərbəst qaçış hərəkətlərini təqdim ediblər.
Tələbələr maneələri akrobatik tullanışlarla keçmək üsullarını öyrəniblər.
Bölmənin digər xəbərləri
