BƏDİİ GİMNASTİKA ÜZRƏ AZƏRBAYCAN ÇEMPİONATINDA İKİNCİ YARIŞ GÜNÜ BAŞA ÇATMIŞDIR
Bakı, 14 noyabr (AZƏRTAC). Bakı Olimpiya İdman Kompleksində Azərbaycanın bədii gimnastika üzrə 16-cı çempionatı davam edir. Çempionatda Azərbaycan idmançıları ilə yanaşı, Bolqarıstan gimnastları Stelyana Yankova, Anastasiya Kisse və Siyana Vasilyeva müsabiqədənkənar iştirak edirlər.
Ümumilikdə yarışlara 82 gənc gimnast qatılmışdır. Kiçik yaş qruplarına daxil olan uşaqlar iki proqram - gimnast aləti olmadan və iplə yarışda iştirak edirlər. 1995-1997-ci illərdə anadan olmuş yeniyetmələr isə halqa, top, ip və gürzlə çıxış edirlər.
Turnirin ikinci günü döşək üzərinə 1999-cu və 2000-ci il təvəllüdlü gimnast qızlar çıxmışlar. Jalə Piriyeva 2000-ci il təvəllüdlü gimnastlar arasında 57,5 bal toplayaraq qızıl medal qazanmışdır. Ruqiyyə Səttarova 53,7 balla 2-ci, Viktoriya Belyaninova isə 52,9 bal toplayaraq 3-cü yeri tutmuşlar.
1999-cu ildə anadan olmuş gimnastlar arasında 61,75 bal toplayan Emiliya Bağıyeva qalib gəlmişdir. Mehparə Mənsurova 57,9 balla 2-ci, Nərminə Hüseynova isə 57,5 balla 3-cü yerə çıxmışlar.
Bədii gimnastika üzrə Azərbaycan çempionatı noyabrın 15-də başa çatacaqdır.
Bölmənin digər xəbərləri
