Belarusda keçirilən anım mərasimində Xocalı soyqırımının dəhşətlərindən danışılıb
Bakı, 24 fevral, AZƏRTAC
Azərbaycan Respublikasının Belarus Respublikasındakı səfirliyində Xocalı soyqırımının 25-ci ildönümünə həsr olunmuş anım mərasimi keçirilib.
Səfirlikdən AZƏRTAC-a verilən məlumata görə, tədbir iştirakçıları Xocalıda həlak olan soydaşlarımızın xatirəsini bir dəqiqəlik sükutla yad ediblər. Sonra Azərbaycanın Belarusdakı səfiri Lətif Qəndilov çıxış edərək Ermənistanın Azərbaycana qarşı işğalçı siyasətinin tarixi kökləri, əsrlərboyu xalqımıza qarşı həyata keçirdikləri vəhşiliklər, soyqırımı aktları, xüsusilə Xocalı soyqırımı barədə ətraflı məlumat verib. O, çıxışı zamanı XX əsrin sonlarında ermənilər tərəfindən törədilən Xocalı soyqırımını İkinci Dünya müharibəsi zamanı alman faşistləri tərəfindən Belarusda törədilmiş Xatın faciəsi ilə müqayisə edib və miqyasına görə Xocalı faciəsinin daha dəhşətli bir faciə olduğunu bildirib.
Səfir deyib ki, o dövrdə hakimiyyətdə olan qüvvələr Xocalı faciəsinə siyasi qiymət verilməsi və bu faciənin dünya ictimaiyyətinə çatdırılması üçün heç bir addım atmayıblar. Azərbaycan xalqının ümummilli lideri Heydər Əliyevin təşəbbüsü ilə 1994-cü ildə Azərbaycan parlamenti ilk olaraq bu faciəyə siyasi qiymət verib və 26 fevralı Xocalı soyqırımı günü kimi elan edib. Azərbaycan Respublikasının Prezidenti İlham Əliyevin apardığı düzgün və məqsədyönlü xarici siyasətin nəticəsidir ki, 10-dan çox ölkənin milli qanunvericilik orqanı, həmçinin İslam Əməkdaşlıq Təşkilatı Xocalıda dinc əhalinin qırğınını ən kəskin şəkildə pisləyib, Xocalı faciəsinin soyqırımı və insanlıq əleyhinə cinayət aktı kimi tanınmasına dair çoxsaylı qətnamə və qərarlar qəbul ediblər. O, Xocalı faciəsi ilə bağlı həqiqətlərin dünya ictimaiyyətinə çatdırılmasında Heydər Əliyev Fondunun vitse-prezidenti Leyla Əliyeva tərəfindən 2008-ci ildən başladılmış “Xocalıya ədalət!” təbliğat-informasiya kampaniyasının rolunun böyük olduğunu bildirib.
L.Qəndilov qeyd edib ki, səfirlik fevral ayının 17-də və 21-də Belarusun Mogilyov, Bobruysk və Qrodno şəhərlərində Azərbaycan diasporu ilə birgə Xocalı soyqırımına həsr olunmuş anım mərasimləri keçirib. Həmin şəhərlərin və vilayətlərin yerli hakimiyyət orqanlarının rəhbərləri ilə görüşlər keçirilib və bu görüşlər zamanı onlara Ermənistan-Azərbaycan, Dağlıq Qarabağ münaqişəsi və XX əsrin ən böyük faciələrindən olan Xocalı soyqırımı barədə geniş məlumat verilib. Faciənin 25 iliyi ilə bağlı səfirliyin hazırladığı press-reliz onlara təqdim edilib.
Səfir Xocalı soyqırımı ilə bağlı məlumatların Belarus ictimaiyyətinə çatdırılması işində səfirliklə yanaşı, Belarusda fəaliyyət göstərən Azərbaycan diaspor təşkilatlarının üzərinə böyük məsuliyyət düşdüyünü qeyd edərək, bunun üçün diaspor təşkilatları arasında birliyin vacib olduğunu vurğulayıb.
L.Qəndilov Xocalı qətliamı kimi faciələrin bir daha təkrarlanmaması üçün bütün Azərbaycan xalqının Prezident İlham Əliyevin ətrafında birləşməsinin və ölkəmizin xoş gələcəyi naminə dövlətimizin başçısının apardığı uğurlu daxili və xarici siyasətə dəstək olmağın zəruriliyini bildirib.
Tədbirdə Belarus Azərbaycan İcmaları Konqresinin sədri Natiq Bağırov çıxış edərək Belarusda yaşayan soydaşlarımızın Xocalı soyqırımı haqqında həqiqətlərin ölkə ictimaiyyətinə çatdırılması işində hər zaman səfirliklə birgə fəaliyyət göstərməyə hazır olduqlarını söyləyib.
Belarusda xidməti ezamiyyətdə olan Azərbaycan Respublikasının iqtisadiyyat nazirinin müavini Sahib Məmmədov çıxış edərək bildirib ki, bu gün Prezident İlham Əliyevin rəhbərliyi altında uğurlu iqtisadi islahatlar aparılır və ölkəmizin hərbi-siyasi qüdrətinin artırılması üçün böyük işlər həyata keçirilir.
Sonra tədbir iştirakçıları Xocalı faciəsinə həsr olunmuş “Məhv edilmiş şəhər” filminə baxıblar.
Səfirliyin foyesində Xocalı soyqırımını əks etdirən fotostend, eləcə də Ermənistan-Azərbaycan, Dağlıq Qarabağ münaqişəsi, Azərbaycan həqiqətlərinə dair müxtəlif məzmunlu kitablar, bukletlər və digər əyani materiallardan ibarət sərgi təşkil olunub.
Bölmənin digər xəbərləri
