BEYNƏLXALQ MÜNASİBƏTLƏR İNSTİTUTUNDA GÖRÜŞ
Görüşdə Yaponiyanın təhsil və elm naziri, ölkənin sabiq baş naziri, sabiq xarici işlər naziri, tanınmış elm xadimləri, nüfuzlu diplomatlar, səfirlər, iş adamları, hərbçilər, Yaponiyanın Bakıdakı keçmiş səfiri, hazırda Yaponiya Xarici Əlaqələr İnstitutunun idarəedici direktoru olan Toşiyuki Fucivara, Yaponiya ictimaiyyətinin, kütləvi informasiya vasitələrinin nümayəndələri iştirak edirdilər. Ümumiyyətlə, görüşə 120 nəfər dəvət olunsa da, 150-dən çox adam gəlmişdi.
İnstitutun prezidenti Yukio Yato Azərbaycan Prezidenti İlham Əliyev və xanımı Mehriban Əliyevanı böyük hörmət və ehtiramla salamladı.
Salona toplaşanlar dövlətimizin başçısını hərarətlə qarşıladılar.
Cənab Yukio Yato Azərbaycan Prezidentinin tərcümeyi-halı barədə qısa məlumat verdi.
Prezident İlham Əliyev görüş iştirakçıları qarşısında geniş mühazirə ilə çıxış etdi. Yaponiyaya səfərinin uğurlu başlandığını bildirən dövlətimizin başçısı ölkələrimiz arasındakı münasibətlərin səviyyəsindən çox məmnun olduğunu vurğulayaraq dedi ki, Azərbaycan müstəqillik əldə etdikdən sonra Yaponiya bizimlə əməkdaşlığa başlayan ilk dövlətlərdən biri olmuşdur. 1998-ci ildə Azərbaycan Prezidenti, xalqımızın ümummilli lideri Heydər Əliyevin Yaponiyaya səfərinin əlaqələrimizin inkişafında xüsusi rolu olmuşdur. 1996-cı ildən başlayaraq, Azərbaycanda iqtisadi artım ildə orta hesabla 10 faiz təşkil etmişdir. Keçən il bu rəqəm 26 faizdən yuxarı olmuş, sənayedə isə artım 33 faiz təşkil etmişdir ki, bunlar da dünyada rekord göstəricilərdir.
Dövlətimizin başçısı regionda siyasi vəziyyətə toxunaraq bildirdi ki, Qafqazda münaqişələr mövcuddur. Azərbaycanı bu regionda sabitlik ərazisi hesab etmək olar və qonşularla gözəl münasibətlər qurmuşuq. Azərbaycan təbii sərvətlərinə, yerləşdiyi coğrafi mövqeyinə görə cəlbedici bir ölkədir, ona böyük maraq var. Lakin biz Azərbaycanı başqa dövlətlərin rəqabət meydanı deyil, bütün dövlətlərin, onların şirkətlərinin qarşılıqlı maraqlar əsasında fəaliyyət göstərdiyi bir ərazi kimi görmək istəyirik.
Azərbaycan Prezidenti son iki il yarım ərzində ölkəmizdə 340 min yeni iş yerinin açıldığını, yoxsulluğun səviyyəsinin aşağı düşdüyünü, bu problemin həllinin qarşıda duran əsas məqsədlərdən olduğunu, sosial proqramların həyata keçirildiyini bildirdi. Eyni zamanda vurğuladı ki, Azərbaycanda qaçqın və məcburi köçkünlərin olması sosial sahədə ciddi problemlər yaradır. Ermənistan Azərbaycan ərazisinin 20 faizini hələ də işğal altında saxlayır, etnik təmizləmə siyasəti həyata keçirir. Bunun da nəticəsində 1 milyondan çox insan qaçqın və məcburi köçkün vəziyyətinə düşmüşdür. Azərbaycan əhalisinin sayına nisbətdə qaçqın və məcburi köçkünlərin sayına görə dünyada ən ağır vəziyyətdə olan ölkədir. Dövlətimizin başçısı münaqişənin mənşəyində separatizmin durduğunu, siyasi, hüquqi və tarixi nöqteyi-nəzərdən ədalətin bərpa olunacağına əminliyini ifadə etdi. Xüsusi vurğuladı ki, Dağlıq Qarabağ tarixən heç vaxt Ermənistan ərazisi olmamışdır. Ermənilər bu ərazilərə sonradan köçüb gəlmişlər, toponimlərin heç biri erməni mənşəli deyildir. Onlar yalnız buraya köçüb gələndən sonra yer adlarını dəyişmişlər. Prezident buna nümunə kimi Xankəndi şəhərini misal gətirdi.
Dağlıq Qarabağ da daxil olmaqla Azərbaycanın ərazi bütövlüyünün bütün dövlətlər, o cümlədən BMT tərəfindən tanındığını, yalnız Ermənistanın Azərbaycanın ərazi bütövlüyünü tanımadığını bildirən dövlətimizin başçısı İlham Əliyev dedi ki, ölkəmizin ərazi bütövlüyü məsələsi danışıqlar mövzusu deyildir. Danışıqların mövzusu işğal edilmiş torpaqların geri qaytarılması, etnik təmizləmə və təcavüz qurbanı olan insanların geri qaytarılması, Dağlıq Qarabağa Azərbaycanın tərkibində yüksək muxtariyyət statusunun verilməsidir. Bütün bunlar beynəlxalq hüququn norma və prinsiplərinə uyğun olmalıdır. Biz münaqişəni danışıqlar yolu ilə həll etməyə ümid edirik. Beynəlxalq birlik münaqişənin həllində daha fəal rol oynamalıdır. Çünki münaqişə, bütövlükdə, regionun inkişafı üçün ən böyük maneədir.
Dövlətimizin başçısı daha sonra bildirdi ki, Azərbaycanın neft və qaz ehtiyatlarının dünya bazarlarına çıxarılması üçün ölkəmizin ərazisindən milyardlarla dollar dəyərində olan boru kəmərləri çəkilməkdədir və onlar tezliklə işə düşəcəkdir. Avropada son dövrlərdə qaz böhranı baş verdi və indi bu ölkələr alternativ enerji mənbələri axtarırlar. Azərbaycan bu enerji mənbəyi rolunu oynaya bilər.
Dövlətimizin başçısı Azərbaycanda tarixən dini tolerantlığın mövcudluğunu da xatırladaraq dedi ki, biz bu baxımdan təcrübəmizi dünya dövlətləri ilə bölüşə bilərik.
Prezident İlham Əliyev Yaponiya ilə münasibətlərə də toxundu. Dünyanın inkişaf etmiş bu dövləti tərəfindən Azərbaycana böyük həcmli kreditlərin ayrıldığını, qrantların verildiyini xatırlatdı və bildirdi ki, ölkələrimiz arasında çoxlu ümumi cəhətlər var. Bu, milli ənənələrə, böyüklərə və digər xalqlara hörmət hissidir. Dövlətimizin başçısı Azərbaycanda fəaliyyət göstərən yapon şirkətlərinə dövlətimizə və xalqımıza xüsusi hörmətlə yanaşdıqlarına görə təşəkkür etdi.
Sonra Prezident İlham Əliyev görüş iştirakçılarının Azərbaycan-Yaponiya əlaqələri, iqtisadi əməkdaşlığın perspektivləri, ölkəmizin neft strategiyası, Ermənistan-Azərbaycan, Dağlıq Qarabağ münaqişəsi və dini tolerantlıqla bağlı suallarına ətraflı cavab verdi.
İnstitutun prezidenti Yukio Yato dövlətimizin başçısına dərin məzmunlu mühazirəsinə, suallara verdiyi məntiqli və əhatəli cavablara görə görüş iştirakçıları adından təşəkkür etdi, bunun institutun tarixində ən dəyərli görüş kimi qalacağını, yaddaşlarda dərin iz buraxacağını bildirdi. Cənab Yukio Yato görüşdən xatirə olaraq, Prezident İlham Əliyevə institutun adından hədiyyə təqdim etdi.
Görüşdən sonra iştirakçılar Prezident İlham Əliyevə yaxınlaşaraq səmimi görüşüb söhbət etdilər, dərin məzmunlu mühazirəsinə görə təşəkkürlərini bildirdilər.
Bölmənin digər xəbərləri
