BİLƏSUVARDA İCTİMAİ DİNLƏMƏLƏR KEÇİRİLMİŞDİR
Ombudsman Aparatından AZƏRTAC-a bildirmişlər ki, Biləsuvarda insan hüquqlarının müdafiəsi üzrə Milli Fəaliyyət Planı (MFP) ilə bağlı ictimai dinləmə keçirilmişdir.
Tədbirdə rayonun icra hakimiyyəti və bələdiyyələrinin, məhkəmələrin, daxili işlər şöbəsi və prokurorluğun, dairə seçki komissiyalarının, yerli QHT-lər və KİV-lərin, habelə icmaların nümayəndələri iştirak etmişlər.
Azərbaycan Respublikasının insan hüquqları üzrə müvəkkili Elmira Süleymanova MFP-nin təsdiq edilməsindən ötən müddətdə sənədin tətbiqi ilə bağlı görülən işlər barədə məlumat vermişdr. Ombudsman ölkəmizdə vətəndaş cəmiyyətinin, ictimai təşkilatların fəaliyyəti, dövlət başçısının müvafiq Sərəncamı ilə təsdiq edilmiş QHT-lərə Dövlət Dəstəyi Konsepsiyası haqqında söhbət açmışdır.
Müzakirələrdə çıxış edənlər MFP-də məhkəmə, prokurorluq və polis orqanları qarşısında qoyulmuş vəzifələrin icrası istiqamətində görülmüş işlər, müvafiq dövlət orqanlarında insan hüquq və azadlıqlarının təmin olunmasına xüsusi nəzarətin mövcudluğu, vətəndaşlara şəxsiyyət vəsiqəsinin verilməsi vəziyyəti barədə məlumat vermişlər.
Bölmənin digər xəbərləri
