BİNƏQƏDİ RAYONUNDA GÜL BAYRAMI
AZƏRTAC xəbər verir ki, mayın 6-da Binəqədi rayonundakı Heydər Əliyev parkına gəzintiyə çıxan bakılılar və şəhərimizin qonaqları ürəkaçan mənzərə ilə qarşılaşmışlar. Hər tərəf al-əlvan, bahar ətirli güllərə qərq olmuşdur. Burada ulu öndərimiz Heydər Əliyevin 85 illik yubileyi ilə əlaqədar gül bayramı keçirilmişdir.
Binəqədi Rayon İcra Hakimiyyətinin təşkil etdiyi mərasimdə bağça uşaqlarının, məktəblilərin, müəssisə və şirkətlərin nümayəndələrinin müxtəlif çiçək və otlardan, bitkilərdən, yarpaqlardan hazırladıqları rəngarəng tablolar öz görünüşü və ifadəliyi ilə seçilmiş, uşaq təxəyyülünün hədsiz imkanlarını nümayiş etdirmiş, hər kəsdə xoş ovqat yaratmışdır.
Gül bayramında rəngbərəng güllərdən hazırlanmış dövlət rəmzləri, yazın gəlişinə həsr olunmuş rəsm əsərləri, nadir ağaclar, bəzək bitkilərindən istifadə olunmaqla yaradılmış eksponatlardan ibarət sərgilər təşkil olunmuşdur.
Güllərdən hörülmüş zövq oxşayan mənzərələr insanların çöhrələrində təbəssüm oyadırdı. Hamının marağına səbəb olan isə azyaşlı uşaqların təbaşirlə asfalt üzərində çəkdikləri bir-birindən gözəl şəkillər olmuşdur.
Binəqədi Rayon İcra Hakimiyyətinin başçısı Alı Qocayev bildirmişdir ki, gül bayramı Azərbaycanı gülüstana çevirən ümummilli liderimiz, ulu öndər Heydər Əliyevə xalqın kiçik hədiyyəsidir. Gül baharın gəlişi, mübarizlik rəmzidir. Gül bayramı bütün dünyaya sülh, azadlıq, ədalət gətirmək, insanlar arasında sevgi, dostluq münasibətləri yaratmaq üçün əla vasitədir.
Gül bayramı konsert proqramı ilə davam etmişdir.
