Bir əsrlik səs: Naxçıvanda telefon rabitəsinin 100 illiyi
Naxçıvan, 17 mart, AZƏRTAC
Martın 17-də Naxçıvan Muxtar Respublikası Rəqəmsal İnkişaf və Nəqliyyat Nazirliyi tərəfindən Naxçıvanda telefon rabitəsinin yaradılmasına həsr olunmuş “Bir əsrlik səs: Naxçıvanda telefon rabitəsinin 100 illiyi” adlı yubiley tədbiri keçirilib.
Nazirliyin mətbuat xidmətindən AZƏRTAC-ın bölgə müxbirinə bildirilib ki, tədbir iştirakçıları əvvəlcə Ümummilli Lider Heydər Əliyevin Naxçıvan şəhərinin baş meydanında ucalan abidəsini ziyarət edib, abidə önünə gül dəstələri qoyaraq Ulu Öndərin xatirəsini ehtiramla anıblar.
Naxçıvan Dövlət Texniki Kollecində davam edən tədbirin rəsmi hissəsində Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib, Dövlət Himni səsləndirilib.
Sonra Naxçıvanda telefon rabitəsinin yaranması və inkişaf tarixini əks etdirən “1926-cı ildən bu günə” adlı videoçarx nümayiş olunub.
Naxçıvan Muxtar Respublikasının rəqəmsal inkişaf və nəqliyyat nazirinin müavini, nazir vəzifəsini icra edən Azər Məmmədrəhimov çıxış edərək rabitə sahəsinin keçdiyi inkişaf mərhələlərindən danışıb. O bildirib ki, 1926-cı ildə qəbul edilən qərar Naxçıvanda müasir rabitə sisteminin formalaşmasının təməlini qoyub. Vurğulanıb ki, son yüz ildə həyata keçirilən yeniliklər, tətbiq olunan müasir texnologiyalar və yaradılan infrastruktur dövlət idarəçiliyinin təkmilləşdirilməsinə, iqtisadi fəaliyyətin genişlənməsinə və əhaliyə göstərilən xidmətlərin keyfiyyətinin yüksəldilməsinə mühüm töhfə verib.
Nazir müavini qeyd edib ki, hazırda Naxçıvanda rabitə və rəqəmsal xidmətlərin inkişafı dövlət siyasətinin prioritet istiqamətlərindəndir və gələcək illərdə innovativ texnologiyaların tətbiqi, rəqəmsallaşmanın genişləndirilməsi və müasir xidmətlərin əlçatanlığının artırılması istiqamətində ardıcıl tədbirlər davam etdiriləcək.
Azərbaycan Milli Elmlər Akademiyasının Naxçıvan Bölməsinin sədri İsmayıl Hacıyev, Naxçıvan Muxtar Respublikası Dövlət Arxiv İdarəsinin rəisi Mehman Məmmədov və Naxçıvan Dövlət Texniki Kollecinin direktoru Asəf Ruşanov rabitə sahəsinin tarixi inkişaf mərhələləri, əldə olunan nailiyyətlər, müasir texnologiyaların tətbiqi və perspektivləri barədə danışıblar. Çıxışlarda bildirilib ki, informasiya-kommunikasiya texnologiyalarının sürətli inkişafı rabitə xidmətlərinin keyfiyyətinin yüksəldilməsinə, idarəetmədə çevikliyin artırılmasına və regionun sosial-iqtisadi inkişafının sürətlənməsinə mühüm təsir göstərir.
Tədbirdə, həmçinin rabitə sahəsində uzun illər fəaliyyət göstərmiş əməkdar rabitəçi Səmayə Quliyeva, uzunmüddətli əmək fəaliyyəti ilə seçilən Elbrus Qocayev, eləcə də gənc əməkdaş, İkinci Qarabağ müharibəsi iştirakçısı Turqay Məhərrəmov çıxış edərək xatirələrini və təəssüratlarını bölüşüblər.
Yubiley münasibətilə rabitə sahəsində uzun illər səmərəli fəaliyyət göstərmiş bir qrup əməkdaş fəxri fərman və hədiyyələrlə təltif olunub.
Tədbirin bədii hissəsində nazirliyin əməkdaşı Təhmin Bağırovun ifası təqdim olunub, Naxçıvan Dövlət Texniki Kollecinin “Buta” rəqs qrupu tərəfindən rəqs və musiqi nömrələri nümayiş etdirilib.
Müxbir- Nail Əsgərov
Bölmənin digər xəbərləri
