BOLQARISTAN PREZİDENTİ GEORGİ PIRVANOVUN NİTQİ
Şadam ki, bu səfər çərçivəsində iki ölkənin biznes nümayəndələri ilə görüşmək imkanı əldə etmişəm. Mən bilirəm ki, siz iş adamlarısınız və buna görə də ümumi məsələlərdən danışıb vaxtınızı almayacağam. Mən sizə əməli tövsiyələr vermək niyyətində də deyiləm, çünki iqtisadi vəziyyətin xüsusiyyətləri ilə məhz siz yaxşı tanışsınız. Belə olan halda, Bolqarıstan Prezidentinin bu görüşə gəlməsinin mənası nədədir?
Mənim üçün mühüm olan budur ki, sizin dəqiq bildiyiniz kimi, Prezident və dövlət təsisatları ölkələrimizin biznesini dəstəkləyirlər, mən bunu Bolqarıstanın adından deyirəm. Bu isə sərbəst bazar iqtisadiyyatının qaydalarına zidd deyildir. Lakin münasibətlərimizin biznes sahəsində sürətini artırması üçün dəstək lazımdır, axı burada iştirak edən dövlət nümayəndələrinin real və fəal müdaxiləsi olmadan bu məqsədə çatmaq çox çətindir. Sizə yaxşı məlum olan bir faktı xatırlatmaq istəyirəm. Prezident İlham Əliyevlə baxışlarımızda oxşar məqamlar çoxdur, lakin onlardan biri xüsusilə vacibdir. Bu, siyasətin, diplomatiyanın iqtisadiləşdirilməsi barədə tezisdir. Mən inanıram ki, biznesmenlər bundan iki dövlətin başçılarının dəstəyi kimi istifadə edəcəklər.
Eyni zamanda hesab edirəm ki, belə forumların mühümlüyü həm də onların intensiv informasiya mübadiləsinə kömək etməsindədir. Çünki etiraf etmək lazımdır ki, biz bir-birimizi siyasi, mənəvi və iqtisadi cəhətdən bir o qədər yaxşı tanımırıq.
Bu da çox vacib şərtdir ki, bugünkü görüşlərimiz zamanı qarşılıqlı öhdəliklərlə yanaşı, həm də ölkələrimizdəki biznes mühitlərini dəqiqləşdirmək üçün vacib olan informasiyalar da səslənmişdir. Bu səfərimdə Azərbaycanın iqtisadi inkişafının mənim üçün yeni olan bəzi amilləri ilə, məsələn, ölkədə ÜDM-in artması ilə tanış oldum. Xarici sərmayələrin dəstəklənməsi və təşviqi ilə bağlı informasiya da çox mühüm idi. Biz Bolqarıstanda sərmayələrə münasibətdə belə siyasətlə tam mənada öyünə bilərik.
Hörmətli xanımlar və cənablar, lakin bu mövqedən başlayaraq və sonra bir çox informasiya mərhələləri var və bu yolu biz əl-ələ verib keçməliyik. Bu mənada mən hökumətlərarası komissiyanın işini nəinki alqışlayır və dəstəkləyirəm, həm də öhdəliklərin yerinə yetirilməsinə, habelə informasiya axını mübadiləsinə nəzarət edəcək əlaqələndirmə vəsiləsinin yaradılması haqqında onun qərarını alqışlayıram.
Zənnimcə, biz təkcə əmtəə mübadiləsi məsələləri ilə məşğul olmamalıyıq, qarşılıqlı sərmayələr, habelə birgə müəssisələr yaradılması məsələlərini gündəliyə daxil etmək pis olmazdı. Daha iri infrastruktur layihələrindən söhbət getdiyi halda biznes bizi dəstəkləyə bilər. Azərbaycan kimi, Bolqarıstan da bu layihələrin tez və səylə həyata keçirilməsində eyni dərəcədə maraqlıdır. Biz bu layihələrin gerçəkləşdirilməsində mühüm amil olmalıyıq.
İnformasiyanın genişləndirilməsindən danışarkən sizin diqqətinizi ona cəlb etmək istərdim ki, burada, bu salonda iqtisadiyyat nazirinin müavini cənab Jarcinipulov əyləşmişdir. İstərdim təklif edim ki, birgə komissiyanın növbəti iclasını Bolqarıstanın Qara dəniz sahillərində keçirək. Əminəm ki, Prezident İlham Əliyev də bu ideyanın həyata keçirilməsinə maraq göstərəcək və bu, həmin ideyanın reallaşdırılmasını tamamilə başqa səviyyəyə qaldırardı.
Xanımlar və cənablar, bir daha demək istəyirəm ki, bu forum zamanı hər hansı konkret ideya və təkliflərin yaranması məni sevindirərdi. Öz növbəmdə, sizi əmin etmək istəyirəm ki, mən və mənim administrasiyam onların heç olmasa, bir hissəsinin həyata keçirilməsinə şad olardıq.
Sizə təşəkkürümü bildirir və uğurlar arzulayıram.
X X X
Sonra Bolqarıstan Prezidenti Biznes mərkəzinin fəxri qonaqlar kitabına ürək sözlərini yazdı.
Bölmənin digər xəbərləri
