DÜNYA
BORC İÇİNDƏ BATAN ERMƏNİSTAN DAHA BİR OBYEKTİNİ RUSİYANIN MÜLKİYYƏTİNƏ VERDİ
İTAR-TASS agentliyindən AZƏRTAC-a daxil olmuş xəbərdə deyilir ki, Ermənistanın ən iri energetika obyektlərindən biri- Razdan DRES-i respublikanın RF-yə dövlət borcunun ödənilməsi hesabına sentyabrda Rusiyanın mülkiyyətinə keçəcəkdir.
DRES-in baş direktoru Albert Bağdasaryan bildirmişdir ki, stansiya əvvəlcə Rusiya Əmlak Münasibətləri Nazirliyinə, sonra isə onu idarə edəcək şirkətlərdən birinə veriləcəkdir.
Güman edildiyinə görə, DRES Rusiyanın mülkiyyətinə verildikdən sonra stansiyada istehsal olunan elektrik enerjisinin qiyməti təbii qazın ucuzlaşması hesabına aşağı düşə bilər. Hazırda stansiya Ermənistanda ən iri təbii qaz istehlakçısıdır və maya dəyərinə görə ən bahalı elektrik enerjisi istehsal edir.
Bundan əvvəl Ermənistan hökuməti bildirmişdi ki, DRES-in Rusiyaya verilməsi elektrik enerjisini qonşu Türkiyəyə və regionun digər ölkələrinə ixrac etməyə imkan yaradacaqdır.