Böyük Britaniya COVID-19-un müalicəsində molnupiravir dərmanının istifadəsinə icazə verib
London, 4 noyabr, AZƏRTAC
Böyük Britaniyanın Dərmanların Tənzimlənməsi Təşkilatı COVID-19-un müalicəsi üçün hazırlanmış molnupiravir dərmanının istifadəsinə icazə verib.
AZƏRTAC xəbər verir ki, bu Böyük Britaniyada istifadə üçün təsdiqlənmiş ilk COVID-19 dərmanıdır.
Böyük Britaniyanın səhiyyə naziri Səcid Cavid deyib: "Bu gün ölkəmiz üçün tarixi bir gündür. Britaniya dünyada koronavirusun müalicəsi üçün dərmanı təsdiqləyən ilk ölkə olub. Dərman daha çox immun sistemi zəif olan xəstələr üçün nəzərdə tutulub”.
ABŞ-ın əczaçılıq şirkəti “MSD” və “Ridgeback Biotherapeutics” tərəfindən istehsal olunan molnupiravir koronavirusun müalicəsində istifadə edilən ilk özəl antiviral dərmandır.
Dərman virusun surətlə yayılmasında iştirak edən fermenti hədəf alır və onun genetik kodunu zədələyir. Dərmanın virusun yayılmasının qarşısını alacağı, orqanizmdə virusun səviyyəsini aşağı salacağı və xəstəliyin şiddətini azaldacağı proqnozlaşdırılır.
MSD əczaçılıq şirkəti müalicənin gələcəkdə koronavirusun yeni variantlarına qarşı eyni dərəcədə təsirli olacağına ümid etdiyini bildirib.
Aynurə Tağıyeva
AZƏRTAC-ın xüsusi müxbiri
London
Bölmənin digər xəbərləri
