Böyük Britaniya parlamentində “ASAN xidmət”in uğurlarından danışılmışdır
Bakı, 11 iyul (AZƏRTAC). Böyük Britaniya parlamentində hökumət texnologiyalarının müzakirəsi ilə bağlı keçirilmiş “dəyirmi masa”da Azərbaycanda korrupsiyaya qarşı mübarizəyə və şəffaflığın artırılmasına istiqamətlənmiş “ASAN xidmət”in uğurlu fəaliyyəti yüksək qiymətləndirilmişdir.
“Dəyirmi masa” parlamentin üzvü Bob Bləkmanın təşəbbüsü ilə “Total Politics” jurnalı və Azərbaycan Avropa Cəmiyyəti (TEAS) tərəfindən təşkil olunmuşdur.
Tədbirdə qeyd edilmişdir ki, “ASAN xidmət” müxtəlif dövlət idarələrinin xidmət sahələrinin bir çətir altına gətirilməsi prinsipi ilə fəaliyyət göstərir. Vətəndaşlar mərkəzlərdə dövlət orqanları və özəl qurumlar tərəfindən göstərilən 150-dən çox xidmətdən yararlana bilərlər.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzinin direktoru Kamran Ağasi dəyirmi masada demişdir ki, bu təşəbbüs Azərbaycan rəhbərliyi tərəfindən irəli sürülüb. İlk “ASAN xidmət” mərkəzi 2013-cü ilin yanvarında, sonuncu altıncısı isə 2014-cü ilin mayında fəaliyyətə başlamışdır. Hər bir mərkəz gündə azı 2 min vətəndaşa xidmət göstərir və bu günə kimi xidmətdən 2 milyondan artıq insan istifadə etmişdir. Gələn ilin sonunadək bu xidmətin şəbəkəsinin bütün ölkəni əhatə etməsi planlaşdırılır. Başlıca məqsədimiz Azərbaycan vətəndaşları üçün xidmətlərin əlçatan olmasının və səmərəliliyinin təmin edilməsidir. “ASAN xidmət” mərkəzləri korrupsiyadan tamamilə azad və şəffaf məkan kimi tanınmışdır. Bizim mühəndislərin yaratdıqları növbə gözləmə sisteminə uyğun olaraq sifarişlər internet vasitəsilə verilə bilir və sifarişçilərin verdikləri sifarişə nə zaman baxılacağı haqda dəqiq məlumat olur. Bundan başqa, onlar növbələrinin çatması haqda öz telefonlarına bildiriş mesajı da alırlar. Bu isə əlavə vaxt itkisinin və vətəndaşlarda məyusluq hissinin yaranmasının qarşısını alır. Bir ziyarət ərzində vətəndaşlar bir neçə xidmətdən yararlana bilərlər. Bütün “ASAN xidmət” mərkəzlərində xidmət haqları xüsusi quraşdırılmış monitorlarda və istifadəçilər arasında paylanan qiymət vərəqələrində göstərilib. Bu vərəqələrdə, həmçinin tələb olunacaq sənədlər də əvvəlcədən siyahıya alınır. Yenilik bu işin, bu təşəbbüsün əsasını təşkil edir. Korrupsiya ehtimalını yox dərəcəsində saxlamaq üçün dövlət işçilərinin ödənişlə heç bir əlaqəsi yoxdur. Biz hər zaman “ASAN xidmət” mərkəzlərinin işinin mükəmməlləşməsinə çalışırıq. “ASAN xidmət” mərkəzlərinin orta yaş həddi 25 olan işçi heyəti hər cür vəziyyətdə və şəraitdə intensiv təlim keçmişdir. “ASAN” sisteminin bünövrəsində cavabdehlik dayanır və vətəndaşlara Skype, Facebook və başqa sosial şəbəkələr vasitələrlə öz fikirlərini bildirmək tövsiyə olunur. “ASAN xidmət”in əməkdaşları yaxşı işlədiklərinə görə mükafatlandırılırlar. Bu xidmətin yaxşılaşdırılması barədə fikirlərini və tövsiyələrini vətəndaşlar “ASAN” sisteminin yaratdığı “İdeyalar Bankı”nda bildirə bilərlər. Bütün “ASAN xidmət” mərkəzlərində uşaqlar üçün ayrılmış xüsusi otaqlar vardır. Valideynləri “ASAN xidmət”dən istifadə edən müddətdə uşaqlar bu otaqlarda saxlanılır.
Vətəndaşlara Xidmət və Sosial İnnovasiyalar üzrə Dövlət Agentliyinin beynəlxalq və ictimai əlaqələr şöbəsinin rəhbəri Azad Cəfərli demişdir ki, “ASAN xidmət” mərkəzləri şəbəkəsi bürokratiyanın səviyyəsinin aşağı salınması üçün yaradılıb. Sorğu və təkliflər “108” telefon nömrəsi ilə ödənişsiz sorğu mərkəzinə zənglə, eləcə də, Facebook və Twitter vasitəsilə oluna bilər. Bir müddət əvvəl işə salınan səyyar “ASAN xidmət” vətəndaşlara öz evlərində xidmət göstərir və bu xidmət müqabilində əlillərdən və fiziki qüsurlu şəxslərdən xidmət haqqı alınmır. “ASAN xidmət”in qapıları həftənin bütün günləri vətəndaşlar üçün açıqdır. Bu yaxınlarda “ASAN xidmət” yüksək keyfiyyət göstəricisi olan ISO 9001:2008 sertifikatını almışdır. “ASAN xidmət” mərkəzi “bir pəncərə” prinsipi ilə fəaliyyət göstərən və hər zaman yüksək göstərici sertifikatını saxlayan yeganə qurumdur. Hazırda biz mobil xidmət növü olan “ASAN 2” sisteminin fəaliyyəti prinsipi üzərində iş gedir. Biz artıq “ASAN imza”nı tətbiq etməyə başlamışıq. Vətəndaşların maraqlarına cavab vermək və onların gözləntilərini qarşılamaq üçün “ASAN” hər zaman inkişaf edir. Məsələn, pasportun bir saata hazırlanması ilə bağlı gərgin iş və müzakirələr gedir. Azərbaycanda “ASAN” başqa hökumət idarələri üçün nümunəvi ictimai xidmət üzrə standartlar müəyyən etmişdir.
Lord Kilkluni çıxışında Bakıdakı “ASAN xidmət”in heç bir ölkədə analoqu olmayan, çox səmərəli bir sistem olduğunu qeyd etmişdir.
Böyük Britaniya parlamentinin İcmalar Palatasının üzvü, Böyük Britaniya-Azərbaycan parlamentlərarası dostluq qrupunun sədri Kristofer Pinçer bu yaxınlarda Azərbaycana səfəri zamanı Bakıda “ASAN xidmət” mərkəzində olduğunu, orada xidmətlərdən yararlanan insanlarla görüşdüyünü söyləmişdir. O demişdir: “Şübhəsiz ki, bu mərkəzlərin korrupsiyanın səviyyəsinin aşağı salınmasında və ictimai inamın artırılmasında rolu böyükdür. Mən bu modelin digər ölkələrdə tətbiqinin tərəfdarıyam. Burada şəffaflığa riayət edilməsi əsas məsələlərdən biridir”.
Sonra Vətəndaşlara Xidmət və Sosial İnnovasiyalar üzrə Dövlət Agentliyinin rəsmiləri Londondakı Vestminister Şurasında (yerli özünüidarəetmə orqanı) olmuş, burada elektron hökumət xidmətləri ilə bağlı qarşılıqlı fikir mübadiləsi aparmışlar.
Daha sonra qonaqlar əvvəllər müxalifətin kölgə hökumətinin yerli özünüidarəetmə orqanlarının icra aparatının rəhbəri olmuş, hazırda isə parlamentin üzvü Endi Sofordla görüşmüşlər. O, belə görüşlərin mütəmadi keçirilməsinin tərəfdarı olduğunu söyləmiş və qeyd etmişdir ki, “ASAN xidmət” modeli Britaniya hökumətində də tətbiq oluna bilər.
Bölmənin digər xəbərləri
