Böyük Zəfərin əbədi qəhrəmanları - Ədəbiyyat Muzeyində elmi seminar
Bakı, 22 sentyabr, AZƏRTAC
Nizami Gəncəvi adına Milli Azərbaycan Ədəbiyyatı Muzeyində 27 Sentyabr - Anım Gününə həsr olunmuş elmi seminar keçirilib.
AZƏRTAC xəbər verir ki, tədbirdə muzeyin direktoru akademik Rafael Hüseynov çıxış edərək Müzəffər Ali Baş Komandanın rəhbərliyi ilə rəşadətli Azərbaycan Ordusunun qazandığı şanlı Qələbədən və Vətən müharibəsinin tarixi əhəmiyyətindən danışıb. O, Azərbaycanın hərb tarixinə qızıl hərflərlə yazılmış 27 Sentyabr tarixinin ölkə təqvimində ən vacib və əlamətdar günlərdən biri olduğunu vurğulayıb. Bildirib ki, 27 Sentyabr Azərbaycan xalqının yaddaşına qəhrəmanlıq və qürur günü kimi həkk olunub. Məhz həmin gün başlanan 44 günlük Vətən müharibəsi nəticəsində dövlətimiz uzun illər davam edən işğala son qoyaraq tarixi ədaləti bərpa edib. Anım Günü şəhidlərimizin müqəddəs xatirəsinə dərin ehtiramın ifadəsi olmaqla yanaşı, həm də Azərbaycanın azadlıq uğrunda iradəsinin, milli birliyinin və sarsılmaz gücünün təntənəsidir.
"Böyük Zəfərin əbədi qəhrəmanları" mövzusunda məruzə ilə çıxış edən akademik Rafael Hüseynov II Qarabağ müharibəsinin Ali Baş Komandan İlham Əliyevin rəhbərliyi ilə möhtəşəm Qələbə ilə başa çatmasının hər bir Azərbaycan vətəndaşının qəlbində böyük qürur və iftixar hissi yaratdığını qeyd edib. O, Vətən müharibəsində şəhidlik zirvəsinə ucalan igidlərin qəhrəmanlıqlarından bəhs edib. Bildirib ki, onların döyüş meydanında göstərdikləri misilsiz şücaətlər, fədakarlıqlar və qəhrəmanlıq hekayələri gələcək nəsillər üçün əsl vətənpərvərlik məktəbidir.
Alim ölkəmizin ərazi bütövlüyünün və suverenliyinin tam bərpa olunmasının, məcburi köçkünlərin köçkünlük həyatının başa çatmasının və onların doğma yurdlarına qayıtmasının müasir tariximizin ən möhtəşəm hadisəsi olduğunu vurğulayıb.
Direktor qeyd edib ki, İkinci Qarabağ müharibəsi dünya miqyasında hərbi, geosiyasi, texnoloji və hüquqi aspektlərdən ən çox araşdırılan və şərh olunan müasir münaqişələrdən biridir. Dünyanın aparıcı beyin mərkəzləri, hərbi akademiyaları və siyasi analitikləri bu müharibəni XXI əsrin yeni nəsil müharibə modeli kimi qəbul edir və onun mahiyyətini müxtəlif prizmalardan təhlil edirlər.
Akademik Rafael Hüseynov vurğulayıb ki, Vətən müharibəsində şanlı Qələbə xalqımızın igid övladlarının qanı-canı bahasına qazanılıb, torpaqlarımızın işğaldan azad edilməsi uğrunda gedən qanlı döyüşlərdə 2 min 900-dən çox əsgər və zabitimiz şəhid olub.
“Xalqımız və bütün dünya azərbaycanlıları şəhidlərin əziz xatirəsini təkcə 27 Sentyabr - Anım Günü deyil, həmişə ehtiramla yad edir. Zəfər tariximizi yazan şəhidlərimizin əziz xatirəsi daim millətimizin qəlbində yaşayır və yaşadılacaq. Gün gələcək onların hər biri haqqında filmlər çəkiləcək, kitablar yazılacaq, musiqilər, opera əsərləri, romanlar və povestlər yaradılacaq”, - deyə akademik Rafael Hüseynov əlavə edib.
Tədbirdə digər çıxış edənlər Vətən müharibəsi tarixinin əbədiləşdirilməsi istiqamətində görülən işlərdən, şanlı Ordumuzun gücü və qüdrətindən danışıblar.
Fotoqraf – Azər İbrahimov
Bölmənin digər xəbərləri
