BRİTANİYA LABRADORU DÜNYADA ƏN QOCA İT ADINA İDDİALIDIR
AZƏRTAC xəbər verir ki, Britaniyada 29 yaşlı qarışıq labradorun - Bella ləgəbli itin sahibi Devid Riçardson bildirmişdir ki, onun iti dünyada ən qoca itdir.
O, Bellanı 26 il əvvəl, özünün dediyinə görə, azı üç yaşı olanda it sığınacağından götürmüşdür. Lakin Riçardsonda onun itinin yaşını təsdiq edən sənəd yoxdur.
Sənəd olmadığı üçün Ginnessin Rekordlar kitabı Bellanın yaşını rekord kimi qeydə ala bilmir.
Ginnessin Rekordlar kitabının nümayəndəsi Qaret Divz demişdir: “Biz itin doğumu haqqında sertifikat və ya RSPCA (heyvanları amansız rəftardan müdafiə edən Kral cəmiyyəti) tərəfindən təsdiq edilmiş hər hansı digər dəlil-sübut almayınca Bellanın yaşını sübut edə və onu ən qoca it hesab edə bilmərik”.
Hazırda itlər arasında uzunömürlülüyə görə dünya rekordu Avstraliyada 29 il 5 aylığında ölmüş Blu ləqəbli çoban itinə məxsusdur.
Bölmənin digər xəbərləri
