Britaniya miqrantlara daimi yaşayış hüququ verilməsi qaydalarını sərtləşdirir
Bakı, 30 sentyabr, AZƏRTAC
Böyük Britaniya miqrantlara daimi yaşayış hüququ verilməsi qaydalarını sərtləşdirməyi planlaşdırır, ərizəçilərdən cəmiyyət üçün öz dəyərini sübut etməyi, o cümlədən ingilis dilini “yüksək səviyyədə” bilməsini tələb edir.
AZƏRTAC xəbər verir ki, bu barədə bazar ertəsi Böyük Britaniyanın daxili işlər naziri Şabana Mahmud məlumat verib.
“Reuters” agentliyi yazır ki, hazırda miqrantların əksəriyyəti Böyük Britaniyada beş il yaşadıqdan sonra ölkədə “müddətsiz qalmaq” üçün müraciət edə bilər. Bu, onlara daimi yaşayış hüququ verən statusdur.
Ş.Mahmud qeyd edib: “Ölkədə keçirilən vaxt kifayət deyil. Bu ölkədə yaşamaq haqqını qazanmalısan”.
Onun sözlərinə görə, bu təkliflər üzrə məsləhətləşmələr cari ilin sonunda başlayacaq və hökumətin standart təsnifat müddətinin 10 illik bazaya dəyişdiriləcəyi ilə bağlı əvvəlki bəyanatına əsaslanacaq.
Britaniyalı nazir bildirib ki, onun planları Böyük Britaniyada on ildən çox yaşayan bəzi insanların yeni standartlara cavab vermədikləri təqdirdə hələ də daimi yaşayış hüququndan məhrum edilə biləcəyi ilə bağlıdır.
Mahmud konfransda bildirib ki, o, Avropadan kiçik qayıqlarda on minlərlə insanın gəlməsini dayandırmaq üçün qeyri-populyar addımlar atmağa hazırdır.
İmmiqrasiya uzun müddətdir ki, Böyük Britaniya seçiciləri üçün əsas məsələ olub. Miqrantların sayına nəzarət 2016-cı ildə Avropa İttifaqından çıxmaq üçün səsvermədə də əsas amil idi, lakin Böyük Britaniya Aİ-ni tərk etdikdən sonra immiqrantların ölkəyə axını rekord səviyyəyə çatıb.
Bölmənin digər xəbərləri
