CƏMİYYƏT
Britaniya tədqiqatçıları piylənmədən qoruyan möcüzəli kapsullar icad ediblər
Bakı, 22 iyul (AZƏRTAC). Britaniya tədqiqatçıları zəhlətökən artıq çəkidən çox rahat şəkildə qurtulmağa imkan verən möcüzəli kapsullar icad ediblər. Daha piylənmədən can qurtarmaq üçün iştahası yaxşı adamların özlərini məşqlər və növbənöv pəhrizlər ilə yormalarına ehtiyac yoxdur. Aclıq hissindən qurtulmaq üçün cəmi bir həb qəbul etmək yetərlidir.
AZƏRTAC Britaniya KİV-lərinə istinadla xəbər verir ki, Kraliça Mariya Universitetində aparılan tədqiqatların nəticələrinə görə, toxluq hissinə bağırsağın aşağı şöbəsi daha tez reaksiya verir. Bunun üçün xüsusi əlavələr qəbul etmək lazımdır. Bu zaman bütün həzm yolu mədənin şuntlanması rejimində olduğu kimi işləyir.
Qeyd edək ki, sınaq zamanı möcüzəli kapsulların orqanizmə heç bir əlavə təsiri aşkar edilməyib. Möcüzəli həblərin istehsalına 2019-cu ildə başlamaq planlaşdırılır. Piylənmədən qoruyan həblərin dəqiq qiyməti hələlik müəyyən olunmasa da, alimlər onun münasib olacağını düşünürlər.