BTC ƏSAS İXRAC NEFT KƏMƏRİNDƏ İŞLƏRİN YARIDAN ÇOXU GÖRÜLMÜŞDÜR
AZƏRTAC-ın müxbirinin məlumatına görə, bu haqda layihənin Türkiyədəki menecerləri noyabrın 14-də Adananın Ceyhan qəsəbəsindəki Əzizli kəndində qurulmuş çadır düşərgəsində keçirdikləri mətbuat konfransında məlumat vermişlər.
Layihənin Sivas-Ceyhan bölümünün meneceri David Keyin sözlərinə görə, tikintisinə iyunun 5-də başlanılmış 322 kilometrlik xəttin 82 kilometrlik sahəsində artıq qaynaq işləri tamamlanmışdır. Borularla yanaşı, Toros dağları ətəyi boyu fiber optik kabellər də çəkilmişdir. Tikinti işlərinə 882 yerli sakin cəlb olunmuşdur.
Ceyhan terminalının meneceri Filipp Jelard isə 7 yeni və irihəcmli çənin quraşdırılmasının, habelə inzibati binanın tikintisinin başa çatdığı barədə məlumat vermişdir.
Sonda qeyd olunmuşdur ki, 40 il xidmət göstərəcək əsas ixrac boru kəməri vasitəsilə Azərbaycan neftinin Avropaya nəqlindən Türkiyə ildə 300 milyon dollar gəlir götürəcəkdir.
Bölmənin digər xəbərləri
