BU İL ŞƏKƏR ÇUĞUNDURUNUN ƏKİN SAHƏLƏRİ İKİ DƏFƏ ARTACAQ
Keçən il Kürdəmir rayonunda 2 min ton şəkər çuğunduru istehsal edilmişdir. Hazırda isə rayon ərazisində əkin kampaniyasına ciddi hazırlıq gedir.
Rayon icra hakimiyyətinin aqrar şöbəsindən AZƏRTAC-ın müxbirinə bildirmişlər ki, Kürdəmirin torpaq mülkiyyətçiləri şəkər çuğunduru yetişdirməklə artıq bir neçə ildir məşğuldurlar. Yüksək məhsuldarlıq əldə olunduğu üçün bu sahəyə maraq getdikcə artır. Rayonun torpaq-iqlim şəraiti bol məhsul yetişdirməyə imkan verir, İmişli şəkər zavodu isə əkinçilərə dəstək göstərir. Zavod sahibkarlarla imzaladığı müqaviləyə əsasən onları sərfəli şərtlərlə toxum, texnika, yeri gəldikdə isə avans şəklində pulla təmin edir. Təsadüfi deyildir ki, mütəxəssislər erkən yazda çuğundur sahələrinin 400 hektar, yəni keçən illə müqayisədə 2 dəfə artacağını proqnozlaşdırırlar.
Hazırda ayrı-ayrı sahələrdə şumlama işləri görülür. Bu iş üçün kifayət qədər texnika ayrılmışdır. Havaların quraq və mülayim keçməsi isə şumun sürətlə və keyfiyyətlə çıxarılmasına şərait yaradır.
Bölmənin digər xəbərləri
