Builki mövsüm Gənc Tamaşaçılar Teatrı üçün əlamətdar olub
Bakı, 29 iyun, AZƏRTAC
Azərbaycan Dövlət Gənc Tamaşaçılar Teatrı 90-cı mövsümə yekun vurmağa hazırlaşır.
Teatrın mətbuat xidmətindən AZƏRTAC-a bildirilib ki, bu mövsüm ərzində sənət ocağının yaradıcı kollektivi bir sıra yeni layihələri ilə tamaşaçıların qarşısına çıxıb: “Bu il teatrımız üçün yaddaqalan və uğurlu olub. Belə ki, teatrımızın aktyorları fəxri adlara layiq görüldülər. Artıq bir neçə ildir ki, teatr mövsümün son tamaşalarını bölgələrdə təqdim edirdi. Bu il isə teatrın kollektivi mövsümə elə öz doğma binasında nümayiş olunacaq tamaşalarla yekun vuracaq. Mövsümün son premyerası Ə.Nesinin əsəri əsasında hazırlanmış “Öldürsənə məni, Caniko” adlı tamaşa iyulun 8-nə təsadüf edir. Tamaşanın quruluşçu rejissoru Əməkdar Artist Nicat Kazımovdur. Ümumilikdə isə teatr özünün 90-cı mövsümünə iyulun 15-də yekun vurur. Həmin gün günorta saat 14.00-da balaca tamaşaçılar üçün “Çippolino”, saat 19-da isə Ə.Haqverdiyevin eyniadlı pyesi əsasında hazırlanmış “Pəri cadu” tamaşası təqdim ediləcək. Bu mövsüm teatr bir çox beynəlxalq festivallarda təmsil olunub”.
Bölmənin digər xəbərləri
