Buxarestdə yeni məhdudiyyətlərə qarşı genişmiqyaslı etiraz aksiyaları keçirilib

26.10.2021 [19:03]
Çap et
A⁺ A^-

Buxarest, 26 oktyabr, AZƏRTAC

Buxarestdə bazar ertəsi qüvvəyə minən yeni məhdudiyyətlərə qarşı etiraz aksiyası keçirilib. Nümayişçilər Səhiyyə Nazirliyinə doğru yürüş edib, daha sonra hökumətə doğru hərəkət ediblər. Aksiya iştirakçıları yaşıl sertifikatlara qarşı ( peyvəndolunma, immunitet) bayraqlar və plakatlar daşıyaraq ölkə rəhbərliyini vətəndaşların hüquqlarını pozmaqda ittiham ediblər. Yeni qaydalara əsasən, bütün ictimai yerlərdə maska taxmaq məcburidir, ticarət mərkəzlərinə giriş yalnız peyvənd sertifikatı əsasında mümkündür, özəl tədbirlər qadağan edilir, ölkə səviyyəsində komendant saatı yenidən tətbiq edilir. Yeni tədbirlər 30 gün ərzində qüvvədə olacaq.

Bu ay rekord sayda gündəlik koronavirus infeksiyasına yoluxma və ölüm səbəbindən məhdudiyyətlər sərtləşdirilib. Rumıniyada gün ərzində təxminən 12 min COVID-19 hadisəsi qeydə alınır, 380 nəfər bu xəstəlikdən həyatını itirir.

Ölkə Avropa İttifaqında koronavirusa qarşı peyvəndlərin sayına görə aşağıdan ikinci yerdədir. Xəstəxana çarpayılarının çatışmazlığı səbəbindən ağır xəstələrin bir qismi müalicə üçün xaricə göndərilir.

İqbal Hacıyev

AZƏRTAC-ın xüsusi müxbiri

Buxarest