CABBAR QARYAĞDI ADINA MUĞAM ÜÇLÜYÜNÜN BERLİNDƏ KONSERTİ
Berlinin məşhur konsert salonlarından biri “Uraniya”da ölkəmizin Cabbar Qaryağdı adına muğam qrupunun konserti olmuşdur. Konsertdə Azərbaycan və Türkiyə səfirliklərinin əməkdaşları, Almaniyada məskunlaşmış güneyli-quzeyli soydaşlarımız, türk qardaşlarımız, ölkənin musiqi ictimaiyyətinin nümayəndələri iştirak etmişlər.
Ötən ilin yanvar ayında Berlində təməli qoyulan Muğam mərkəzi konsertdən öncə Almaniya televiziyası, xüsusilə TD-1, TRT- İnternational kanalları vasitəsilə Azərbaycanın zəngin musiqi mədəniyyəti, muğam sənəti, xalq musiqisi, muğam və xalq musiqisi ifaçılığı, o cümlədən Cabbar Qaryağdı adına muğam üçlüyü haqda reklamlar verərək tamaşaçıları konsertə dəvət etmişdi.
Konsertin keçirildiyi salonun foyesində muğam ustalarımızın kompakt disklərinin satış sərgisi təşkil olunmuşdu.
Gənc və istedadlı müğənni Aygün Bayramova mugamları və xalq mahnılarımızı məharətlə ifa etdi. Müğənnini respublikanın əməkdar artistləri tarzən Möhlət Müslümov və kamançaçl Fəxrəddin Dadaşov müşayiət edirdi. Onların ifaları Vətən üçün qəribsəmiş soydaşlarımızı xəyalən Azərbaycana apardı. Dinləyicilər ifaçıları bitib-tükənməyən alqışlarla qarşıladılar. Aygünün sonda ifa etdiyi “Qarabağ şikəstəsi” əzəli Azərbaycan torpağımız Qarabağın himni kimi səsləndi, gül-çiçək dəstələri, gurultulu alqışlarla qarşılandı.
Konsertdə iştirak edən Almaniya musiqiçiləri Azərbaycanın musiqi mədəniyyətini, muğam musiqimizi və ifaçıların sənətkarlığını yüksək qiymətləndirdilər.
Yusif Xəlilov,
AZƏRTAC-ın xüsusi müxbiri
Berlin
Bölmənin digər xəbərləri
