CARİ İLİN SƏKKİZ AYINDA SƏRNİŞİNLƏRİN ƏKSƏRİYYƏTİ AVTOMOBİL VƏ METRO NƏQLİYYATI İLƏ DAŞINMIŞDIR
Dövlət Statistika Komitəsindən AZƏRTAC-a bildirmişlər ki, 2008-ci ilin yanvar-avqustunda nəqliyyat sektorunda 799,8 milyon və ya əvvəlki ilin eyni dövrü ilə müqayisədə 7,4 faiz çox sərnişin daşınmışdır.
Daşımaların 83,3 faizi qeyri-dövlət bölməsinin payına düşmüşdür. Sərnişinlərin əksəriyyəti avtomobil (83,3 faiz) və metro nəqliyyatı (16 faiz) ilə daşınmışdır.
Hesabat dövründə avtomobil nəqliyyatı ilə, fərdi sahibkarların fəaliyyəti də nəzərə alınmaqla, 54,9 milyon ton yük, 666,6 milyon sərnişin daşınmış və əvvəlki ilin eyni dövrü ilə müqayisədə bu göstərici müvafiq olaraq 7,3 və 6,4 faiz artmışdır. Sərnişinlərin 96,7 faizi avtobus, 3,3 faizi isə taksilərin xidmətlərindən istifadə etmişdir. Avtomobil nəqliyyatı ilə yük dövriyyəsi əvvəlki ilin müvafiq dövrü ilə müqayisədə 8,1 faiz, sərnişin dövriyyəsi isə 7,9 faiz artmışdır.
Metro nəqliyyatının xidmətlərindən istifadə edən əhalinin sayı da ötən dövrdə artmış, bu nəqliyyat vasitəsindən 128,2 milyon nəfər və ya əvvəlki ilin eyni dövrünə nisbətən 13,6 faiz çox sərnişin istifadə etmişdir.
Bölmənin digər xəbərləri
