Ceyhun Bayramov: Azərbaycan Ermənistanla münasibətləri normallaşdırmağa hazırdır
Bakı, 4 noyabr, AZƏRTAC
Ermənistanla Azərbaycan arasında postmünaqişə dövrünə aid bir sıra məsələlər var. Buraya nəqliyyat-kommunikasiya xətlərinin açılması məsələsi də daxildir. Bu məsələ Azərbaycan, Rusiya və Ermənistan arasında imzalanan üçtərəfli Bəyanatda yer alıb. Eyni zamanda, Azərbaycan-Ermənistan arasında dövlət sərhədlərinin delimitasiyası və demarkasiyası keçirilməyib. Ümumilikdə bu, normal hal deyil. Dövlətlər arasında olan sərhədlərin müəyyənləşdirilməsinin sivil qaydaları var. Bu proses baş verməlidir.
Bunu AZƏRTAC-a müsahibəsində xarici işlər naziri Ceyhun Bayramov deyib.
O bildirib: “İki ölkə arasında postmünaqişə dövrünün məsələlərinin həllinə dair bir çox təşəbbüslər də mövcuddur. Qonşu, region dövlətlər, beynəlxalq təşkilatlar tərəfindən çoxsaylı təşəbbüslər irəli sürülür. Azərbaycan tərəfi heç vaxt danışıqlardan çəkinməyib. Danışıqlarla bağlı çağırışlara hər zaman qarşılıq vermişik. Mövqeyimiz ədalətlidir və beynəlxalq hüquqa əsaslanır. Ölkələrin suverenliyi, ərazi bütövlüyü, sərhədlərin toxunulmazlığı prinsipləri əsasında hər zaman münasibətləri normallaşdırmağa hazırıq. Bunun üçün görüşlər keçirmək lazım olacaqsa, biz görüşlərə açığıq. Təbii ki, gələcəkdə belə görüşlərin keçirilməsi istisna deyil”.
Bölmənin digər xəbərləri
