Çin və Rusiya hərbçilərinin birgə təlimləri başlayıb
Pekin, 9 avqust, AZƏRTAC
Çin və Rusiya hərbçilərinin Çinin Ninsia Huy muxtar bölgəsində təlimləri başlayıb.
AZƏRTAC xəbər verir ki, bu, COVID-19 virusu yayılmağa başladıqdan sonra Çində keçirilən ilk hərbi təlimdir. Çinin qərb qoşunlarının və Rusiyanın şərq hərb dairəsinin bölmələrinin iştirak etdiyi təlimlərdə terrorizmə qarşı mübarizə və təhlükəsizliyin təminatı məsələsi diqqətdə olacaq.
Müxtəlif mərhələlərdə fevral ayınadək davam edəcək təlimlərə ümumilikdə 10 mindən çox hərbçi qatılacaq. Təlimlərin gedişində artilleriya, zirehli texnika və aviasiyanın iştirakı ilə müxtəlif tapşırıqlar icra olunacaq. Bundan başqa, qoşunların birgə idarə edilməsi, erkən xəbərdarlıq, elektron və informasiya hücumlarına dair tapşırıqlar da yerinə yetiriləcək.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
