DÜNYA
Çində dünyanın ən böyük amfibiya təyyarəsinin növbəti sınağı keçirilib VİDEO
Pekin, 11 may, AZƏRTAC
Çində dünyanın ən böyük amfibiya təyyarəsi olan AG600-ün növbəti sınağı həyata keçirilib.
AZƏRTAC xəbər verir ki, Hubey vilayətinin Cinmen şəhərində keçirilmiş sınaq zamanı təyyarənin suya girmə, suda hərəkət və dönmə, sudan havaya qalxma və suya enmə, sahilə çıxma yoxlamaları həyata keçirilib. Bütün sınaq bir saata yaxın davam edib.
Çin Aviasiya Sənayesi Korporasiyası tərəfindən hazırlanan təyyarə təxminən "Boeing 737" sərnişin təyyarəsi ölçüsündədir. İlk uçuşunu 2017-ci ilin dekabrında keçirmiş təyyarə xilasetmə işlərində, yanğına qarşı mübarizədə, su hövzələrində monitorinq və mühafizə işlərində istifadə üçün nəzərdə tutulub.
Qeyd edək ki, Çin aviasiyasının ən uğurlu layihələrindən olan amfibiya təyyarəsinin texniki xüsusiyyətləri ona ən əlçatmaz yerlərdə öz vəzifəsini yerinə yetirməyə imkan verəcək. Uçuş kütləsi 53,5 ton olan təyyarənin maksimal uçuş sürəti saatda 500 kilometrə qədərdir. Əlavə yanacaq doldurma olmadan havada 12 saata qədər qala bilər. Təyyarənin qanadlarının eni 38,8 metr, uzunluğu isə 37 metrdir. Təxminən 20 saniyə ərzində 12 ton su toplayan təyyarə həm adi aerodromlara, həm də su səthinə enib qalxmağa qadirdir. Bütün lazımi texniki sınaqlardan keçdikdən sonra təyyarənin seriya buraxılışına başlanılacaq. İstehsalçı şirkət artıq bu tip 17 təyyarənin satışına dair sifariş qəbul edib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
