Çində keçmiş nazir korrupsiya əməllərinə görə ömürlük həbs edilib
Pekin, 8 may, AZƏRTAC
Çin Kommunist Partiyası Mərkəzi Komitəsi Siyasi Bürosunun keçmiş üzvü, keçmiş kənd təsərrüfatı naziri Sun Cençay məhkəmənin qərarı ilə ömürlük azadlıqdan məhrum edilib.
AZƏRTAC xəbər verir ki, məhkəmənin gedişində keçmiş məmurun 2002-2017-ci illərdə müxtəlif vəzifələrdə çalışarkən səlahiyyətlərindən sui-istifadə etməklə fərdi və vəzifəli şəxslərdən, şirkətlərdən 170 milyon yuan (27,1 milyon ABŞ dolları) məbləğində nağd pulu və daşınmaz əmlakı rüşvət kimi qəbul etməsi təsdiqlənib. Prokurorluğun ittiham aktında qeyd olunub ki, Sen Cençay rüşvəti birbaşa və ya özünə yaxın şəxslər vasitəsilə alıb.
Məhkəmə onun siyasi hüquqlardan ömürlük məhrum edilməsi, bütün şəxsi əmlakının və qeyri-qanuni yolla əldə etdiyi vəsaitin müsadirə olunması barədə də qərar verib.
Sen Cençay qeyd olunan dövrdə Pekin şəhərinin Şuni rayon partiya komitəsinin sədri, Pekin partiya komitəsi daimi komitəsinin üzvü, kənd təsərrüfatı naziri, Cilin vilayət partiya komitəsinin katibi, Çinin ən böyük şəhərlərindən olan Çunçin partiya komitəsinin katibi vəzifələrində çalışıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
