ÇİNDƏN MİNGƏÇEVİRƏ YENİ AVARÇƏKMƏ QAYIQLARI GƏTİRİLMİŞDİR
Mingəçevir Şəhər İcra Hakimiyyətindən AZƏRTAC-ın müxbirinə bildirmişlər ki, əvvəllər “Kür” Olimpiya Tədris İdman Mərkəzində avarçəkmə üzrə yarışların keçirilməsi üçün geniş imkanlar olmuşdur. Lakin 1992-ci ildən fəaliyyətsiz qalan bu avarçəkmə bazasının Regionların sosial-iqtisadi inkişafı Dövlət Proqramına uyğun olaraq müasir üslubda yenidən qurulması məqsədilə hazırda orada aparılan söküntü işləri başa çatmaq üzrədir. Altı hektar ərazini əhatə edəcək yeni kompleksin inşasına gələn ay başlanacaqdır. Bazanın 2008-ci ilin sentyabrınadək istifadəyə verilməsi nəzərdə tutulur.
Buna belə, Mingəçevir şəhər uşaq-gənclər idman məktəbinin avarçəkənlərinin məşqləri üçün ikinci baza adlanan yer yenidən qurulmuş və uşaqların ixtiyarına verilmişdir. İnşasına 50 min manat vəsait sərf olunan bu ikinci bazada məşq salonu, soyunub-geyinmə otaqları, duşxanalar, qayıqların təmiri üçün emalatxana və anbarlar vardır.
Azərbaycan Milli Avarçəkmə Federasiyasının dəstəyi ilə bu günlərdə 14 akademik avarçəkmə qayığı, 20 baydarka və digər növ idman qayıqları, onların ehtiyat hissələri bazaya gətirilmişdir. Çinin istehsalı olan qayıqlara 80 min ABŞ dolları məbləğində vəsait sərf olunmuşdur.
Bölmənin digər xəbərləri
