Çingiz Qənizadə: Uduzan tərəf yenə Ermənistan oldu
Bakı, 16 sentyabr, AZƏRTAC
Ermənistan dünyada təcavüzkar, işğalçı dövlət kimi tanınır. Baxmayaraq ki, dünyanın bir sıra aparıcı dövlətləri, həmçinin nüfuzlu beynəlxalq təşkilatları bu işğalı açıq şəkildə etiraf etmir, ancaq fakt faktlığında qalır. Azərbaycanın beynəlxalq səviyyədə tanınmış əraziləri 30 ilə yaxın müddətdə Ermənistan ordusu tərəfindən işğal olunmuşdu. Hətta dünyanın ən nüfuzlu təşkilatı olan BMT Təhlükəsizlik Şurası Ermənistan silahlı qüvvələrinin işğal etdikləri Azərbaycan ərazilərindən qeyd-şərtsiz çıxarılması barədə 4 qətnamə qəbul etmişdi. Eləcə də digər nüfuzlu beynəlxalq təşkilat olan AŞPA, QİƏT, Avropa İttifaqı, Qoşulmama Hərəkatı bu mövzuda qətnamə qəbul ediblər. Bütün bunlar Ermənistanın işğalçı dövlət olduğunun beynəlxalq səviyyədə tanınması deməkdir. Təəssüf ki, dünyada baş alıb gedən ikili standartlar və islamofobiya əsl həqiqətin üzə çıxmasına problem yaradır. Buna baxmayaraq, Azərbaycan Prezidentinin üzaqgörənliyi, siyasi iradəsi və rəşadətli Ordumuzun misilsiz qəhrəmanlığı sayəsində Ermənistanın 30 illik işğalına son qoyuldu.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.
Hüquq müdafiəçisi deyib ki, Ermənistan 2020-ci il 10 noyabr tarixli kapitulyasiya aktını rəsmən imzaladıqdan sonra işğal siyasətindən əl çəkməli, ölkəsinin gələcəyi barədə düşünməli idi. Ancaq Azərbaycanın tarixi Qələbəsini həzm edə bilməyən Ermənistan və dünya erməniliyi, o cümlədən işğalçı ölkənin tərəfdarları, eləcə də ölkəmizin sürətli inkişafını həzm edə bilməyən bir sıra dövlətlər Ermənistanı, necə deyərlər, qızışdırır təxribatlar törətməyə təhrik edirlər. Hər dəfə də uduzan tərəf Ermənistan olur. Çünki artıq Azərbaycan Ordusu dünyanın ən güclülərindən biri olduğunu dəfələrlə təsdiqləyib. Ona görə də Ermənistan təxribat törədən kimi, dərhal başı üzərində “dəmir yumruğ”u görür. Bu dəfə də belə oldu. Məlum olduğu kimi, sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törətdi. Ermənistan silahlı qüvvələrinin diversiya qrupları sutkanın qaranlıq vaxtında Azərbaycan Ordusunun bölmələrinin mövqeləri arasındakı ərazilərinin və təminat yollarının minalanmasını həyata keçirib. Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verib. Baxmayaraq ki, bizim də itkilərimiz oldu, düşmənin bütün hərbi infrastrukturu darmadağın edildi və həm hərbi texnika, həm də canlı qüvvə sarıdan böyük itkilər verdi.
Ç.Qənizadə deyib ki, Azərbaycan Ordusu düşmənin atəş nöqtələrini müəyyənləşdirərək həmin əraziləri darmadağın edib. Hələ ki, iki ölkə arasında sərhədlər tam müəyyənləşdirilmədiyindən, yəni delimitasiya və demarkasiya məsələsi öz həllini tapmadığından Ermənistanın hadisələrin onun ərazisində baş verdiyini iddia etməsi ölkəmizə qarşı növbəti şantajdır. Düşmənin təxribatlarına rəşadətli Ordumuz tərəfindən cavab verilən kimi, Ermənistanın baş naziri dərhal müxtəlif dövlətlərə, o cümlədən KTMT-yə yalvarıb-yaxardı. Ancaq bu dəfə də müsbət cavab almadı. Axı, KTMT Ermənistana sülhməramlı kontingent göndərmək iqtidarında deyil. Buna elə bir səbəb də yoxdur. Ermənistan həm bu təşkilatdan, həm də Rusiyadan rədd cavabı aldı. Çünki artıq bütün dünyaya da bəllidir ki, Azərbaycan öz ərazilərini işğaldan azad edir, haqq-ədalət uğrunda mübarizə aparır. Ermənistan tərəfi artıq açıq şəkildə dərk etməlidir ki, avantüraların heç bir əhəmiyyəti və köməyi yoxdur.
Komitə sədri bildirib ki, Azərbaycanın öz ərazilərini qorumaq hüququ var. Bu, beynəlxalq hüquq normalarında da təsbit olunub. Ona görə də düşmən unutmamalıdır ki, hansı nöqtələrdən Azərbaycana atəş açacaqsa, həmin nöqtələr vurulacaq və darmadağın ediləcək: “Azərbaycan dövlətinin niyyəti heç də Ermənistan ərazisinə keçmək, orada hər hansı bir əməliyyat aparmaq deyil. Ancaq rəşadətli Ordumuz öz ərazimizdən atəş açmaqla dövlətimizə qarşı hər hansı bir təzyiq və təhdidin qarşısını almalıdır və alır da. Bu, Azərbaycanın haqq işidir. Məlum olduğu kimi, sentyabrın 12-13-də Ermənistan ordusunun Basarkeçər, İstisu, Qarakilsə və Gorus yaşayış məntəqələri istiqamətində yerləşən bölmələri tərəfindən Azərbaycan Ordusunun Daşkəsən, Kəlbəcər və Laçın rayonları ərazisindəki bəzi mövqeləri, sığınacaqlar və dayaq məntəqələri müxtəlif çaplı silahlar, o cümlədən minaatanlardan intensiv atəşə tutulub. Nəticədə şəxsi heyət arasında itkilər var, hərbi infrastruktura ziyan dəyib. Düşmənin bu təxribatının qarşısı alınmalı idi və alındı da. Ağır itkilərə məruz qalan Ermənistan dərhal vay-şüvənlik salaraq, bir sıra dövlətlərə və beynəlxalq təşkilatlara məlumatlar verərək, guya Azərbaycan Ordusunun onları atəşə tutması barədə məlumatlar çatdırdı, ancaq bu yalan və şantajların heç bir əhəmiyyəti yoxdur. Artıq buna inanan da yoxdur”.
Komitə sədri diqqətə çatdırıb ki, Ermənistan silahlı qüvvələrinin təxribatının, ölkəmizin ərazisinə və suverenliyinə qarşı hərbi təhlükələrin qarşısının alınması, hərbi qulluqçularımızın, o cümlədən Kəlbəcər və Laçın rayonları ərazisində infrastruktur işlərinə cəlb olunmuş mülki işçilərin təhlükəsizliyinin təmin edilməsi məqsədilə hazırda Azərbaycan Ordusunun bu istiqamətdə dislokasiya olunan bölmələri tərəfindən qəti cavab tədbirləri görülür. Qeyd edib ki, Ermənistan ordusu bütün təxribatlarında dinc sakinləri hədəfə alıb. Bu dəfə də iki kəlbəcərli ağır yaralanıb. Onlardan birinin vəziyyəti orta-ağır olaraq qalır. Ümumiyyətlə, faşist xislətli Ermənistan ordusu dinc əhaliyə, uşaqlara, ahıllara, ağbirçəklərə qarşı həmişə amansız olub. Bu da dünyada insan hüquq və azdlıqlarının kobud şəkildə pozulması deməkdir.
Hüquq müdafiəçisi bildirib ki, qəhrəman Ordumuz Ermənistan silahlı qüvvələrinin atəş nöqtələrini susdurmaqla döyüş toqquşmasının miqyasının genişlənməsinin qarşısının alınması məqsədilə zəruri tədbirlər görür. Nə vaxta qədər erməni silahlı birləşmələri təxribat əməliyyatları törədəcəklərsə, layiqli cavablarını alacaqlar. Digər ölkələrə və beynəlxalq təşkilatlara yalvarmaqdansa, sülh müqaviləsini imzalamaq barədə düşünsünlər.
Bölmənin digər xəbərləri
