Çinin BYD kompaniyası elektromobillərin qiymətini bahalaşdırıb
Bakı, 23 noyabr, AZƏRTAC
Çinin aparıcı elektrokar istehsalçısı olan BYD kompaniyası öz məhsullarının qiymətini növbəti dəfə bahalaşdırıb.
AZƏRTAC ÇXR mediasına istinadla xəbər verir ki, bu barədə kompaniyanın çərşənbə günü dərc olunmuş bəyanatında bildirilir.
Bahalaşma kompaniyanın təkcə alternativ enerji ilə işləyən elektromobillərinə deyil, hibrid motorlu avtomobillərinə də təsir edəcək. Məlumata görə, qiymət artımı diapazonu modeldən asılı olaraq 2 min yuandan (təxminən 280 dollar) 6 min yuana (təxminən 840 dollar) qədər nəzərdə tutulub.
BYD bu addımı akkumulyatorların bahalaşması və elektromobillərin alınması üçün dövlət subsidiyalarının həcminin azalması ilə izah edir. Kompaniya ilin əvvəlindən bəri avtomobillərin qiymətini bir neçə dəfə artırıb.
Son illər kompaniya alternativ enerji mənbələri ilə işləyən avtomobillərin satışında müsbət dinamika nümayiş etdirir. 2021-ci ildə satış 231,6 faiz artaraq 593,7 min avtomobilə çatıb. Cari ilin yanvar-sentyabr aylarında isə kompaniyanın ümumi satışı 1,18 milyon avtomobili keçib ki, bu da ötən ilin eyni dövrü ilə müqayisədə 249,56 faiz çoxdur.
Bölmənin digər xəbərləri
